Parlament Senaty "Pedagog mártebesi týraly " zań jobasyn birden eki oqylymda qarap maquldady. Osydan keiin qujat Memleket basshysynyń qol qoiýyna jiberiledi, dep habarlaidy Sputnik Qazaqstan.
Bilim jáne ǵylym ministri Ashat Aimaǵambetovtyń aitýynsha, zańda materialdyq yntalandyrýdyń birneshe tetigi qarastyrylǵan. Máselen, dápterdi teksergeni úshin qosymsha aqylar eki esege artady. Tálimgerlik úshin bir bazalyq jalaqy nemese 17 500 teńge ai saiyn tólenedi.
"Pedagogikalyq sheberlik úshin barlyq muǵalimge 30-50 protsent arasynda qosymsha aqy qarastyrylǵan. Taǵy bir mańyzdy másele, biraz jyldan beri kolledj muǵalimderi, qosymsha bilim berý men balabaqsha muǵalimderi kategoriia boiynsha aqy almaǵan. Endi, osy másele de qarastyryldy. Attestatsiia boiynsha qosymsha aqylar tólenedi. Sondai-aq, jergilikti atqarýshy organ 300 ailyq eseptik kórsetkish kóleminde pedagogterge qosymsha aqy tóleýge quqyly", - dedi Aimaǵambetov Senattyń plenarlyq otyrysynda.
Zań jobasynda pedagog qyzmetimen ainalysýǵa tyiym salý sharttary da bar. Atap aitqanda, psihikalyq jáne minez-qulyqta aýytqýy bar, dárigerdiń baqylaýynda turǵan qabileti shekteýli adamdarǵa pedagogikalyq qyzmetpen ainalysýǵa ruqsat joq. Budan bólek, muǵalimderdiń etika máselelerine basa nazar aýdarylady. Ol úshin árbir bilim berý mekemesinde ádep keńesteri jumys isteidi.
"Al materialdy emes yntalandyrý tetikteri aiasynda muǵalimderdiń balalaryna balabaqshaǵa birinshi kezekte oryn berý normasy qarastyrylyp otyr. Barlyq pedagog aldaǵy ýaqytta 56 kúndik demalysqa shyǵa bastaidy. Sondai-aq, bilim berý mekemelerinde jumys isteitin er azamattardy áskeri qyzmetke shaqyrýdy keiinge qaldyrý normasy keńeitildi", - dep atap kórsetti Aimaǵambetov.
"Pedagog mártebesi týraly" zań ázirlendi
Bilim jáne ǵylym ministrligi "Pedagog mártebesi týraly" zań jobasyn ázirlep, májilistiń qaraýynan ótkizgen bolatyn. Osy qujattyń negizgi baǵyttary:
-
Halyqaralyq olimpiadalardyń, konkýrstar men sporttyq jarystardyń jeńimpazyn, júldegerin daiyndaǵan pedagogke úsh laýazymdyq ailyq mólsherinde birjolǵy syiaqy tóleý;
-
"Qazaqstannyń eńbek sińirgen ustazy" qurmetti ataǵymen marapattalǵan pedagogke 1000 eselengen ailyq eseptik kórsetkish mólsherinde (2019 jyly 2,5 million teńgege teń) birjolǵy tólem berý;
-
2021 jyldyń 1 qyrkúieginen bastap mektep muǵalimderi úshin normativtik oqý júktemesin 18 saǵattan 16 saǵatqa deiin tómendetý;
-
Magistr dárejesi úshin 10 eselengen ailyq eseptik kórsetkish mólsherinde (25 250 teńge) qosymsha aqy engizý;
-
Aýyldyq jerlerde jumys isteitin muǵalimderge jeke turǵyn úi qurylysy úshin jer ýchaskelerin basym tártippen berý.
Prezident Qasym-Jomart Toqaev aldaǵy tórt jyl ishinde muǵalimderdiń eńbekaqysyn birtindep eki ese arttyrýdy tapsyrdy. Osylaisha, kelesi jyldan bastap ustazdardyń jalaqysy 25 paiyzǵa ósedi.
