Qasym-Jomart Toqaev Parlamentaralyq odaqtyń prezidenti Dýarte Pashekony qabyldady, dep habarlaidy "Ult aqparat" Aqordanyń baspasóz qyzmetine silteme jasap.
Áńgimelesý barysynda Qazaqstannyń Parlamentaralyq odaqpen ózara yqpaldastyǵynyń mańyzdy baǵyttary talqylandy.
Prezident Qasym-Jomart Toqaev Dýarte Pashekoǵa iltipat bildire otyryp, Parlamentaralyq odaqpen aradaǵy yntymaqtastyqty nyǵaitýǵa tyń serpin berý turǵysynan onyń elimizge jasaǵan saparynyń mańyzdylyǵyn atap ótti.
– Parlamentaralyq odaq parlamentaralyq bailanystardy damytý isinde mańyzdy ári jetekshi uiym sanalady. Sizdiń saparyńyz parlamenttik diplomatiiany keńeitý turǵysynan saiasi mańyzǵa ie. Biz atalǵan Odaqpen ózara tyǵyz qarym-qatynastardy damytýǵa basa mán beremiz jáne osy mańyzdy uiymnyń tóraǵasy laýazymyndaǵy Sizdiń missiiańyzdy qoldaimyz, – dedi Memleket basshysy.
Qasym-Jomart Toqaev Dýarte Pashekoǵa elimizdegi demokratiialyq institýttardy jáne zań ústemdigin nyǵaitýǵa, adam quqyǵy men genderlik teńdikti qamtamasyz etýge baǵyttalǵan aýqymdy saiasi reformalardyń júzege asyrylýy jóninde aitty. Sondai-aq Memleket basshysy ony 2022 jyldyń qyrkúiek aiynda bolatyn Álemdik dinder kóshbasshylarynyń VII Sezine qatysýǵa shaqyrdy.
Óz kezeginde Dýarte Pasheko kezdesýge múmkindik bergeni úshin Qasym-Jomart Toqaevqa alǵys bildirip, Memleket basshysyn Qazaqstan Táýelsizdiginiń 30 jyldyǵymen quttyqtady. Sonymen qatar ol elimizdiń osy kezeńdegi ekonomikalyq jáne diplomatiialyq tabystaryn joǵary baǵalap, Qazaqstannyń memleketter men adamdar arasynda dialog ornatýdyń jarqyn úlgisi bolyp otyrǵanyna nazar aýdardy.
Portýgaliia parlamentarii Memleket basshysyna Parlamentaralyq odaqty damytýdyń aldaǵy kezeńdegi basymdyqtary týraly aitty.
Sonymen qatar Qazaqstan men Portýgaliia qatynastaryn órkendetý aiasynda Nur-Sultan men Lissabon arasyndaǵy yntymaqtastyqtyń qarqyndy damyp kele jatqany atap ótildi.
