Foto: Akorda.kz
Prezident "Áleýmettik meditsinalyq saqtandyrý qory" KeAQ basqarma tóraǵasy Ábilqaiyr Sqaqovty qabyldady, - dep habarlaidy "Ult aqparat" Aqordanyń baspasóz qyzmetine silteme jasap.
Memleket basshysyna áleýmettik meditsinalyq saqtandyrý júiesiniń jyl basynan beri jáne jalpy MÁMS qolǵa alynǵan ýaqyt ishinde atqarylǵan jumystardyń qorytyndysy týraly esep berildi.
Prezidentke áleýmettik meditsinalyq saqtandyrý júiesin engizý nátijesinde densaýlyq saqtaý salasyna bólinetin qarjy 2,5 ese, al bir turǵynnyń densaýlyǵyna jumsalatyn shyǵyn eki ese óskeni jóninde baiandaldy. Sonymen birge azamattarǵa arnalǵan meditsinalyq kómektiń qoljetimdiligin jaqsartý jaiynda aityldy.
Ábilqaiyr Sqaqov MÁMS júiesiniń tiimdiligin arttyrýǵa qatysty Prezident tapsyrmalarynyń oryndalý barysy týraly aqparat berdi. Atap aitqanda, áleýmettik meditsinalyq saqtandyrý júiesiniń aýqymyn keńeitýge, Qordyń qarjylyq turǵydan turaqtylyǵyn qamtamasyz etýge jáne MÁMS-ke qatysty barlyq protsesti jedel tsifrlandyrýǵa baǵyttalǵan keshendi sharalar júzege asyrylyp jatyr.
Budan bólek, meditsinalyq saqtandyrý júiesiniń qyzmetine qatysty qazaqstandyqtardy mazalaǵan ózekti máselelerge nazar aýdaryldy. Qor josparyn iske asyrý barysynda, eń aldymen, naýqasqa jáne onyń meditsinalyq kómekke qajettiligin óteýge basa mán beriledi.
Kezdesý sońynda Qasym-Jomart Toqaev Ábilqaiyr Sqaqovqa áleýmettik meditsinalyq saqtandyrý júiesiniń tiimdiligin arttyrýǵa baǵyttalǵan birqatar mindet júktedi.
