Foto: AP Photo / Vladimir Tretyakov
Qazaqstan Prezidenti Qasym-Jomart Toqaev Bas prokýratýraǵa jappai tártipsizdikter kezinde, sondai-aq tótenshe jaǵdai engizilgennen keiin ustalǵan adamdarǵa qatysty birqatar tapsyrma berdi, dep habarlaidy "Ult aqparat".
"Qasiretti qańtar" oqiǵalary kezinde jáne tótenshe jaǵdai engizilgennen keiin túrli quqyqbuzýshylyq jasaǵany úshin 2 myńǵa jýyq adam ustaldy. Qylmys jasaǵan adamdar zań boiynsha jaýapqa tartylady. Bas prokýratýraǵa basqa adamdardyń kinási qandai dárejede ekenin anyqtaýdy tapsyramyn. Jaýaptylyqty aýyrlatatyn mán-jai bolmasa, jazany jeńildetý úshin shara qabyldaǵan jón", - dep jazdy Memleket basshysy Twitter-de.
Buǵan deiin Almaty komendatýrasy qalada tártipsizdikterge qatysqany úshin ustalǵandar sany 2 myńnan asqanyn málimdedi.
Almatynyń quqyqqorǵaýshylary búlik pen tonaýǵa qatysqan adamdardy izdestirý jáne ustaý jumysyn jalǵastyrýda. Olardyń mekenjaiy týraly aqparat qala turǵyndarynan da túsip jatyr.
Tártip saqshylary 67 birlik atys qarýy men 3 112 oq-dári tárkilegen.
