Memleket basshysy Qazaqstan qarjygerleri kongresiniń qatysýshylaryna beineúndeý joldady, dep habarlaidy "Ult aqparat" Aqordaǵa silteme jasap.
Qasym-Jomart Toqaev beineúndeýinde jiynǵa qatysýshylardy Qazaqstan qarjygerleri kongresiniń ashylýymen quttyqtap, bul elimiz úshin airyqsha mańyzdy oqiǵa ekenin atap ótti.
– Biylǵy basqosý Ulttyq valiýta kúni jáne Táýelsizdigimizdiń 30 jyldyǵy qarsańynda ótip jatyr. Munyń simvoldyq máni zor. Óitkeni tól teńgemiz – Eldigimiz ben Egemendigimizdiń shynaiy belgisi. Biz toqsanynshy jyldardyń basynda negizgi naryqtyq reformalardy júzege asyrdyq. Qarjy qatynastaryn keshendi túrde qaita qarap, jańǵyrttyq. Álemdegi ozyq tájiribeni eskere otyryp, bank salasyna túbegeili ózgerister engizdik. Elimizdiń tolyqqandy qarjylyq infraqurylymy jasaldy. Sonyń nátijesinde qor jinap, ony tiimdi jumsaýǵa múmkindik týdy. Sondai-aq aýqymdy investitsiiaǵa jol ashyldy, – dedi Memleket basshysy.
Prezidenttiń aitýynsha, biz syndarly memlekettik saiasattyń arqasynda básekege qabiletti qarjy sektoryn qalyptastyrdyq.
– Qazaqstannyń qarjy salasy óńirdegi eń ozyq júie sanalady. Búginde onyń jiyntyq aktivi 35 trillion teńgeden asady. Bul – elimizdiń ishki jalpy óniminiń teń jartysynan kóp, – dedi Qasym-Jomart Toqaev.
Memleket basshysy ótken jyldyń basynda koronavirýs pandemiiasy jáne onyń saldary álem ekonomikasyna orasan zor ziian keltiretinin eshkim kútpegenin atap ótti. Sondai-aq naryqtardyń quldyraýy keiingi júz jylda bolǵan eń aitýly oqiǵanyń biri ekenin aitty.
– Memlekettik jáne halyqaralyq institýttardyń qabyldaǵan teńdessiz sharalary jaǵdaidyń odan ári shielenisip ketýine jol bermedi. Alaida, shikizat, saýda jáne qarjy salalaryndaǵy ahýal áli de qubylmaly bolyp tur. Jahandyq syn-qaterler men úrdisterdi eskere otyryp, qarjy salasyn odan ári damytý – memlekettiń basym baǵyttarynyń biri. Bul rette eldiń ekonomikalyq ósimin qoldaý onyń negizgi mindeti bolyp qala beredi. Memleket qiyn kezeńderde otandyq qarjy sektoryn únemi qoldady. Sonyń arqasynda búginde bankterdiń jumysy turaqty ári ekonomikany nesielendiretin áleýeti joǵary. Sondyqtan olar ekonomikany jyldam qalpyna keltirýde jáne ony odan ári ártaraptandyrýda negizgi ról atqarýǵa mindetti, – dedi Prezident.
Qasym-Jomart Toqaev otandyq qor naryǵyn, sonyń ishinde ekonomikany qarjylandyrýdyń taǵy bir mańyzdy kózine ainalýy qajet «Astana» halyqaralyq qarjy ortalyǵyn belsendi damytý kerek ekenin atap ótti. Memleket basshysynyń paiymdaýynsha, qazirgi kezeńde jahandyq qarjy institýttarynyń qarqyndy damýyna, kórsetiletin qarjylyq qyzmetterdi barynsha tsifrlandyrýǵa bailanysty mindetterdi de eskerý qajet.
– Bul máseleler baiypty talqylaýdy jáne teńgerimdi sheshimderdi izdestirýdi qajet etedi. Osy baǵyttardyń dáiekti damýy elimizdiń básekege qabilettiligin arttyrýǵa qosymsha jol ashady. Túptep kelgende, halqymyzdyń ál-aýqatyn arttyrý – memlekettik organdardyń, qarjy institýttarynyń aldyndaǵy ortaq mindet, – dedi Memleket basshysy.
Qazaqstan Prezidenti atalǵan jiyn elimizdiń qarjy salasyn nyǵaita túsý úshin tiimdi sharalar ázirleýge septigin tigizetinine senetinin jetkizdi. Beineúndeý sońynda qarjy júiesiniń qyzmetkerlerin taǵy da kásibi merekesimen quttyqtap, kongress jumysyna tabys tiledi.
