Foto: Akorda.kz
Memleket basshysy Qasym-Jomart Toqaev qazaqstandyqtardy Táýelsizdik kúnimen quttyqtady, - dep habarlaidy "Ult aqparat" Aqordanyń baspasóz qyzmetine silteme jasap.
Qurmetti otandastar! Sizderdi Táýelsizdik kúnimen quttyqtaimyn!
Bul – halqymyzdyń myzǵymas birligin aishyqtaityn ulyq meiram. Táýelsizdik kúni elimizdiń azattyǵyn jáne jańa tarihi kezeńde derbes damý jolyna túskenin áigileidi. Biz osy mereili merekede halqymyzdyń bostandyq týraly armanyn aqiqatqa ainaldyrýǵa ólsheýsiz úles qosqan erlerdiń rýhyna taǵzym etemiz.
Azattyqtyń arqasynda elimiz jańa belesterge qadam basty. Táýelsizdigin jariialaǵannan keiin ǵana Qazaqstan diplomatiialyq turǵydan moiyndalyp, halyqaralyq qaýymdastyqtyń tolyqqandy múshesi retinde tanyla bastaldy.
Táýelsizdik bárinen qymbat! Ony tabysty ári baqýatty memlekettiń tiregi sanalatyn qasterli qundylyq retinde kózdiń qarashyǵyndai saqtaý – ata-babalarymyzdyń jáne keler urpaqtyń aldyndaǵy qasietti boryshymyz.
Qazaqstan strategiialyq baǵytynan ainymai, memlekettilik dástúrin dáiekti túrde damytyp keledi. Barlyq salada qolǵa alynǵan aýqymdy ózgerister san ǵasyrlyq tól shejiremizdiń jańa paraǵyn ashty. Biz barshaǵa birdei múmkindik berip, ósip-órkendeýge jol ashatyn Ádiletti Qazaqstandy quryp jatyrmyz. Qoǵamda birlik pen turaqtylyq, zań men tártip, jaýapkershilik pen yntymaq, bilimpazdyq pen eńbekqorlyq siiaqty qundylyqtar berik ornyqsa, osy maqsatqa qol jetkizetinimiz anyq.
Barshańyzǵa zor densaýlyq, baq-bereke jáne tolaǵai tabys tileimin! Kók týymyz máńgi jelbirei bersin! Táýelsizdigimiz baiandy bolsyn!", - delingen quttyqtaýda.
