Foto: © Sputnik / Vladislav Vodnev
Prezident Qasym-Jomart Toqaev "Bolashaq" halyqaralyq stipendiiasynyń 30 jyldyǵyna arnalǵan saltanatty forým qatysýshylaryna quttyqtaý hatyn joldady, - dep habarlaidy "Ult aqparat" Aqordanyń resmi saityna silteme jasap.
"Qurmetti Forýmǵa qatysýshylar! Barshańyzdy "Bolashaq" halyqaralyq stipendiiasynyń belgilengenine 30 jyl tolýymen quttyqtaimyn!
Bul – Qazaqstannyń ár túkpirindegi daryndy jastarǵa jol ashqan teńdessiz baǵdarlamanyń mereili belesi. Osy biregei joba memleketimizde ozyq oily ári bilikti kadrlar rezervin qalyptastyrýǵa zor septigin tigizdi.
"Bolashaq" baǵdarlamasynyń myńdaǵan túlegi búginde túrli saladaǵy oń ózgeristiń jarshysy bolyp, elimizdiń igiligi úshin tabysty eńbek etip júr.
Qazir Qazaqstandy órkendete túsý úshin tyń serpilis qajet. Bizdiń aldymyzda el ekonomikasynyń qurylymyn qaita túzý, saiasi júieni odan ári jańǵyrtý jáne shyn máninde ádiletti ári inkliýzivti qoǵam qalyptastyrý siiaqty aýqymdy mindetter tur. Osy oraida bilim berý salasyna investitsiia salý jáne azamattardyń óz áleýetin tolyq paidalanýyna múmkindik jasaý óte mańyzdy.
Memleket adal azamatqa tán qasietterdi boiyna sińirgen daryndy, eńbekqor, talapty jastardy árdaiym qoldaidy. "Bolashaq" baǵdarlamasynyń túlekteri ǵana emes, elimizdegi barlyq jas mamandar Qazaqstandy jan-jaqty jańǵyrtý jolyndaǵy keleli iske óz úlesin qosady dep senemin.
Barshańyzǵa baq-bereke, tolaǵai tabys tileimin!", - delingen Prezident hatynda.
