Memleket basshysy Qasym-Jomart Toqaev Ulttyq dombyra kúnine arnalǵan kontsertke bardy, dep habarlaidy Aqorda.
Qasym-Jomart Toqaev qazaqstandyqtardy Ulttyq dombyra kúnimen quttyqtai otyryp, Elbasynyń bastamasymen dombyrany ulyqtaý merekesin ótkizý igi dástúrge ainalǵanyn aitty.
«Bul – halqymyzdyń tamyry tereńde jatqan tól ónerin dáripteitin meiram. Qazaq pen dombyra – bir-birinen bóle-jarýǵa bolmaityn egiz uǵym. Dombyra – kóne zamannyń ańyzdaryna arqaý bolǵan kieli aspap. «Aqsaq qulan» kúiiniń shyǵý tórkinin bilmeitin qazaq kemde-kem. Ejelgi dáýirden jetken qasterli dombyra urpaqtan-urpaqqa miras bolyp keledi. Qazaq san ǵasyrlyq shejiresiniń kýási bolǵan qasietti aspapty boitumaryna balaǵan. Qazirgi tilmen aitsaq, bul – bizdiń ulttyq brendimiz», – dedi Prezident.
Memleket basshysynyń aitýynsha, qudiretti qos ishektiń úninde uly dalanyń jyry, babalardyń syry saqtalǵan. Halqymyz qýanyshy men qaiǵysyn, arman-tilegi men úmitin kúi arqyly jetkizgen. Memleket basshysy dombyraǵa til bitse, tebirenbeitin qazaq joq ekenin, qandastarymyz mekendeitin qai elge barsaq ta, dombyranyń qońyr úni kúmbirlep turatyndyǵyn atap ótti. Baitaq dalany dúbirletken kúishilerdiń asyl murasy – rýhani qazynamyzdyń baǵa jetpes bailyǵy.
«Qurmanǵazynyń «Saryarqasy», Táttimbettiń «Sarjailaýy» kúi óneriniń shyńy sanalady. Nurǵisanyń «Aqqýy» – qazaqtyń qanyna sińgen bekzat ónerdiń biregei týyndysy. Sondai daryn ielerinen amanat bolǵan kieli mura búginde adamzattyń asyl qazynasyna ainaldy. Kúi óneri IýNESKO sheńberindegi qundylyqtar qataryna qosyldy. Dombyrany ulyqtap, kúi ónerin damytý úshin elimizde kóptegen igi ister atqarylýda. Elordada kúi atasy Qurmanǵazynyń eskertkishi ashyldy. Al keshe ǵana kúishi Dina apamyzdyń qurmetine sáýlet týyndysy boi kóterdi», – dedi Qasym-Jomart Toqaev.Prezident ozyq mádenieti bar ulttyń rýhy árdaiym biik bolary sózsiz dep sanaidy. Sondyqtan óskeleń urpaq osy kieli ónerdi laiyqty jalǵastyrýy qajet. Mektepte dombyra úirenýge arnalǵan fakýltativ sabaqtaryn engizý jónindegi bastamany qoldaǵan Qasym-Jomart Toqaev, bul sabaqtar balalarymyzdyń ulttyq sanasynyń kúsheiýine jáne olardyń kózqarasy men mádeni tanymynyń keńeiýine oń yqpal etetinine senim bildirdi.
Sóz sońynda Qasym-Jomart Toqaev mýzyka óneri eshkimdi ult pen tilge bólmeitinin, dombyranyń úni elimizdegi barsha etnostardy ortaq qundylyqqa biriktirip, rýhani tutastyqqa bastaityndyǵyn atap ótti.
«Ultymyzdyń rýhyn kóteretin dombyraǵa ár shańyraqtyń tórinde oryn bar. Sebebi dombyra – qazaqtyń jany», – dedi Prezident.
