Memleket basshysy qaýipsizdik jónindegi 56-shy Miýnhen konferentsiiasynyń paneldik sessiiasynda «Geografiialyq ornalasýdyń mańyzy: Ortalyq Aziia týraly áńgime» taqyrybynda sóz sóiledi. Aýǵanstan Prezidenti Ashraf Ǵani da pikirtalasqa spiker retinde qatysty. Is-sharaǵa amerikalyq diplomat, Halyqaralyq bailanystar jónindegi keńes prezidenti Richard Natan Haas moderatorlyq etti, dep habarlaidy "Ult aqparat" Aqordaǵa silteme jasap.
Is-shara qyzý pikirtalas formatynda ótti. Spikerler moderatordyń suraqtaryna jaýap berip, Ortalyq Aziiadaǵy qaýipsizdikti qamtamasyz etý jónindegi oilaryn ortaǵa saldy.
Memleket basshysy óńirdiń alatyn orny týraly aita kele, Ortalyq Aziianyń jahandyq geosaiasattaǵy róli arta túsetinin atap ótti.
Qasym-Jomart Toqaev forýmǵa qatysýshylarǵa Qazaqstannyń syrtqy saiasi basymdyǵy jáne elimizdiń Reseimen, Qytaimen, Eýroodaqpen, AQSh-pen, sondai-aq, Aýǵanstanmen ózara qarym-qatynastary týraly áńgimeledi.
Óńirdegi qaýipsizdikti qamtamasyz etý máselesi arnaiy taqyryp retinde talqylandy. Memleket basshysy esirtki tasymalyna qarsy kúres jónindegi sharalarǵa, Qazaqstannyń terrorizmge qarsy is-qimyldarǵa qosqan úlesine, «Jýsan», «Rýsafa» operatsiialarynyń qorytyndylaryna egjei-tegjeili toqtaldy.
Sonymen qatar Qasym-Jomart Toqaev jiynǵa qatysýshylarǵa óziniń prezidenttiginiń basymdyqtary, elimizdegi saiasi jáne ekonomikalyq reformalardyń negizgi baǵyttary týraly aityp berdi. Osy rette Prezident ekonomikany ártaraptandyrýdyń, innovatsiialar men tsifrlandyrýdy damytýdyń asa mańyzdy ekenine nazar aýdardy.
Sessiianyń sońynda Memleket basshysy jiynǵa qatysýshylardyń suraqtaryna jaýap berdi.
