Memleket basshysy Qasym-Jomart Toqaev "Qalaýlym", "Qalaýym sen" atty baǵdarlamalarǵa qatysty tapsyrma berdi. Bul týraly prezidenttiń baspasóz hatshysy Berik Ýáli Facebook-tegi paraqshasynda jazdy, dep habarlaidy "Ult aqparat".
Berik Ýáli sońǵy kezderi respýblikalyq arnalardan shyǵyp jatqan "Qalaýlym", "Qalaýym sen" baǵdarlamalaryna qoǵam tarapynan qarsylyq kóbeiip ketkenin atap ótti. Onyń pikirinshe, oǵan bul baǵdarlamalardyń halqymyzdyń mentalitetine, salt-dástúrine, ulttyq bolmysyna qaishy kelýi sebep bolyp otyr.
"Azamattar áleýmettik jelilerde qol jinap, baǵdarlamalardyń jabylýyn talap etip, BAQ betterinde túrli syni maqalalar jariialanyp jatyr", - deidi ol.
Berik Ýáli memleket basshysy atalǵan baǵdarlamalarǵa qatysty qoǵamnyń ustanymyn biletinin aitty. Soǵan sáikes tapsyrma berilgen.
"Halyqtyń pikiri eskerilip, arnalardyń da saiasatyna nuqsan keltirilmei tiisti sheshim shyǵarylady", - dep túiindedi prezidenttiń baspasóz hatshysy.
