Foto: Akorda.kz
Prezident Ishki ister ministrliginiń basshylyq quramymen keńes ótkizdi, dep habarlaidy "Ult aqparat" Aqordanyń baspasóz qyzmetine silteme jasap.
Jiynda Memleket basshysy jańa Ishki ister ministri Erjan Sádenovti tanystyrdy.
Prezident vedomstvonyń jańadan taǵaiyndalǵan basshysy ishki ister organdarynda 30 jyl eńbek etkenin, aýdandyq jedel ýákil qyzmetinen ministrdiń orynbasary laýazymyna deiingi satydan ótkenin atap ótti.
Qasym-Jomart Toqaev burynǵy ministr Marat Ahmetjanovtyń basshylyq etken kezinde ishki ister organdarynyń qyzmetin uiymdastyrýdaǵy oń ózgeristerge erekshe nazar aýdaryp, tsifrlyq tehnologiialardy engizý, jol qozǵalysy erejelerin buzý faktilerin jedel tirkeý, sondai-aq politsiia jumysynyń ashyqtyǵyn qamtamasyz etý syndy bastamalaryna toqtaldy.
Keńes barysynda Memleket basshysy Qasym-Jomart Toqaev keshegi Qazaqstan halqyna Joldaýynda azamattarymyzdyń ál-aýqatyn jaqsartý jáne túbegeili áleýmettik-ekonomikalyq ózgerister jóninde naqty tapsyrmalar bergenin aitty. Atalǵan tapsyrmalardyń iske asyrylýy kóbine quqyqtyq tártiptiń deńgeiine bailanysty ekenin jáne osy rette politsiia mańyzdy ról atqaratynyn atap ótti.
Memleket basshysy ishki ister organdarynyń jumysyn túbegeili ózgertýge, halyqpen jáne azamattyq qoǵam institýttarymen turaqty bailanys jasaýǵa qatysty jańa ideialardyń qajettigine nazar aýdardy.
– Servistik politsiiany damytý isin jalǵastyrý kerek. Ol úshin turǵyndarǵa quqyq buzýshylyqtarǵa múldem tózbeýshilik qaǵidatynyń saqtalýyn qamtamasyz etýge múmkindik beretin yntymaqtastyqtyń ózara tiimdi joldaryn usyný qajet. Kámeletke tolmaǵandardyń quqyqtaryn qorǵaý júiesi de aitarlyqtai ózgeristerdi qajet etedi. Biyl 30 maýsymda IIM keńeitilgen alqa otyrysynda bergen tapsyrmalarymnyń iske asyrylýyn qamtamasyz etý kerek. Júktelgen mindetter – óte mańyzdy. Sondyqtan olardy tabysty oryndaý úshin barlyq jeke quram jáne eń aldymen, ministrlik basshylyǵy judyryqtai jumylýy qajet, – dedi Qasym-Jomart Toqaev.
Prezident IIM basshylyǵyna júktelgen mindetterdi sapaly ári ýaqtyly júzege asyrý isinde tabys tiledi.
