©Pixabay
Memleket basshysy Qasym-Jomart Toqaev Eýropa odaǵynyń prezidenti Sharl Mishelmen telefon arqyly sóilesti, dep habarlaidy "Ult aqparat" Aqordanyń resmi saityna silteme jasap.
Qazaqstan Prezidenti byltyr qarasha aiynda ótken Briýsseldegi jeke kezdesýdiń jáne qol jetkizilgen ýaǵdalastyqtardy júzege asyrýdyń mańyzdy ekenin aitty.
Memleket basshysy Qazaqstannyń Eýropa odaǵymen keńeitilgen seriktestik jáne yntymaqtastyq jóninde Kelisimge qol qoiǵan birinshi el ekenin atap ótti. Bul qarym-qatynastarymyzdy jańa deńgeige kóterdi. Qasym-Jomart Toqaev Qazaqstannyń eń iri saýda seriktesi sanalatyn Eýropa odaǵymen ornyqty bailanysty damytýǵa beiildi ekenine nazar aýdardy.
Áńgime barysynda óńirlik jáne jahandyq kún tártibindegi máseleler jan-jaqty talqylandy. Olar azyq-túlik daǵdarysynyń kúrdelene túskenine alańdaýshylyq bildirdi.
Qasym-Jomart Toqaev halyqaralyq ahýaldy jaqsartý, eń ózekti degen máseleler boiynsha senimdi dialog ornatý úshin kúsh biriktirýdiń mańyzdy ekenine toqtaldy.
– Qazaqstan Shyǵys pen Batys, Ońtústik pen Soltústik arasynda «aralyq naryq» rólin atqara otyryp, bul iske óz úlesin qosa alar edi, – dedi Memleket basshysy.
Budan bólek Qasym-Jomart Toqaev Eýropa odaǵyn balama transqurlyqtyq dálizderdi, sonyń ishinde Transkaspii halyqaralyq kólik baǵytyn damytý isinde yntymaqtastyq ornatýǵa shaqyrdy.
Prezident álemdegi energetikalyq qaýipsizdikke tónetin qaterge alańdaitynyn jetkizdi. Onyń aitýynsha, Qazaqstan álem jáne Eýropa naryǵyndaǵy ahýaldy turaqtandyrý úshin óziniń kómirsýtegi áleýetin paidalanýǵa daiyn ekenin málimdedi.
Memleket basshysy Qazaqstannyń Aýǵanstandaǵy turaqtylyqqa jáne osy elge kómek berýge qatysty halyqaralyq qoǵamdastyqtyń kúsh-jigerin qoldaitynyn naqtylady.
Áńgime sońynda Qasym-Jomart Toqaev Sharl Misheldi Qazaqstanǵa saparmen kelýge shaqyrdy.
