Foto: Akorda.kz
Prezident Májilis tóraǵasy Erlan Qoshanovty qabyldady, - dep habarlaidy "Ult aqparat" Aqorda saityna silteme jasap.
Memleket basshysyna Parlamenttiń tómengi palatasynyń VIII shaqyrylymynyń I sessiiasy aiasyndaǵy qyzmeti týraly málimet berildi. Sessiia bastalǵannan beri májilismenderdiń qaraýynda bolǵan 82 zań jobasynyń 20-syna depýtattar bastamashylyq jasady. Olardyń ishinde Zańsyz iemdenilgen aktivterdi qaitarý, Onlain-platformalar jáne onlain-jarnama, Semei iadrolyq qaýipsizdik aimaǵy, suiytylǵan gaz ainalymy, elektrli samokattardyń qozǵalysyn retteý týraly jáne basqa da zańdar bar.
Májilis spikeri konstitýtsiialyq reformanyń qorytyndysy boiynsha Palatanyń jumys formatyna engizilgen ózgerister jóninde aitty. Májilistiń 6 partiialyq fraktsiiadan, sondai-aq bir mandatty depýtattardan jasaqtalýy zań shyǵarý jumysynyń ashyqtyǵyn arttyryp, sailaýshylarmen keri bailanysty kúsheitti. Olar Úkimet múshelerine joldaǵan depýtattyq saýaldarynda azamattardyń ózekti máselelerin kóbirek kótere bastady.
Ótken sessiia barysynda alǵash ret jylýmen qamtamasyz etý salasyndaǵy basqarýǵa qatysty Joǵary aýditorlyq palatanyń esebi tyńdaldy jáne atalǵan salada keshendi problemalar bar ekeni anyqtaldy.
Depýtattar qoǵamdaǵy, sonyń ishinde óńirlerge jasaǵan saparlary kezinde jinaqtaǵan problemalar boiynsha jaýapty ministrlikter basshylyǵynyń aldyna birqatar naqty másele qoidy. Jylý elektr ortalyqtaryn jáne jylýmen qamtamasyz etý jelilerin jańǵyrtýǵa erekshe nazar aýdaryldy.
Qazirgi tańda májilismender óńirlerde halyqpen kezdesýler ótkizip jatyr. Sapar barysynda Májilistiń kelesi sessiiasynda qaralatyn Sý, Biýdjet, Salyq jáne Qala qurylysy kodeksteriniń jobalary boiynsha talqylaýlar uiymdastyrylyp, usynystar jinaqtalady.
Sonymen qatar, Erlan Qoshanov parlamenttik diplomatiia aiasynda atqarylǵan jumystardyń qorytyndysy týraly aitty. Sessiia bastalǵannan beri Ázerbaijan, Belarýs, Qyrǵyzstan, Resei, Túrkiia, Ózbekstan parlamentteriniń basshylarymen jáne basqa da elderdiń zań shyǵarýshy organdarynyń ókilderimen kezdesýler ótkizilgen.
