Memleket basshysy Básekelestikti qorǵaý jáne damytý agenttiginiń tóraǵasy Serik Jumanǵarindi qabyldady, dep habarlaidy "Ult aqparat" Aqordanyń resmi saityna silteme jasap.
Prezidentke Agenttiktiń turǵyn úi, qurylys materialdary, áleýmettik mańyzy bar azyq-túlik ónimderi jáne janar-jaǵarmai naryqtaryndaǵy baǵalardy turaqtandyrý jónindegi jumystary týraly esep berildi.
Agenttik tóraǵasynyń aitýynsha, atalǵan salalar boiynsha monopoliiaǵa qarsy qabyldanǵan sharalardyń nátijesinde birqatar iri qurylys kompaniialary bastapqy turǵyn úi baǵasyn maýsym-tamyz ailarynda orta eseppen 7-20 paiyzǵa tómendetken, qurylys materialdary baǵasynyń ósýi sáýir aiyndaǵy 10,9 paiyzdan, tamyz aiynda 3,2 paiyzǵa deiin, benzin baǵasy sáýir aiyndaǵy 8,4 paiyzdan, mamyr aiynda 0,2 paiyzǵa deiin arzandaǵan. Qazir de osy baǵalar saqtalyp otyr.
Áleýmettik mańyzy bar azyq-túlik ónimderi baǵasynyń apta saiynǵy qymbattaý kórsetkishi sáýir aiyndaǵy 0,6 paiyzdan 14 qyrkúiektegi málimet boiynsha 0,1 paiyzǵa deiin azaiǵan.
Memleket basshysyna taýar birjalaryndaǵy kommýnaldyq-turmystyq kómir saýdasynyń barysy týraly baiandaldy. Onda jergilikti operatorlar otyndy shaǵyn partiialarmen tikelei satyp alýǵa múmkindik alady.
Qasym-Jomart Toqaevqa Agenttiktiń dárilik zattardyń baǵasyn qaita retteý, radiojiilikterdi aýktsionǵa shyǵarý arqyly mobildi bailanys naryǵynda básekelestik qalyptastyrýǵa jaǵdai jasaý, jolaýshylar tasymaly 2 million adamnan asatyn áýejailardaǵy jerde qyzmet kórsetý túrlerine táýelsiz tasymaldaýshylardyń qol jetkizýin qamtamasyz etý, sondai-aq farmatsevtika, jol qurylysy, meditsina salalarynda júrgizip jatqan monopoliiaǵa qarsy baqylaý sharalary týraly málimet berildi.
Sonymen qatar Serik Jumanǵarin Memleket basshysyna Agenttiktiń kedergiler jónindegi keńes alańdarynda básekelestikti damytýǵa qatysty shekteýlerdi joiý qyzmeti, básekelestik máseleleri jónindegi zań jobasy, básekelestikti damytý tujyrymdamasynyń ázirlemesi, Ekonomikalyq yntymaqtastyq jáne damý uiymyna múshe elderdegi básekelestikti damytýdyń sońǵy úrdisteri týraly aitty.
Kezdesý sońynda Memleket basshysy áleýmettik azyq-túlik pen taýarlardyń baǵasyn baqylaýda ustaýdy tapsyrdy.
