Foto: Aqordanyń baspasóz qyzmeti
Aqordada Qasym-Jomart Toqaev agroónerkásip kesheni salasyndaǵy biznes ókilderimen kezdesý ótkizdi. Jiynda aýyl sharýashylyǵyn damytýdyń túitkildi máseleleri men perspektivalary talqylandy, dep habarlaidy "Ult aqparat" Aqordanyń baspasóz qyzmetine silteme jasap.
Kezdesýde Prezident byltyr aýyl sharýashylyǵy salasyndaǵy ósim 9,1 paiyzdy quraǵanyn atap ótti. Onyń aitýynsha, egin bitik shyǵyp, diqandar 23 million tonnaǵa jýyq astyq jinady. Sondai-aq egis alqaptaryn ártaraptandyrý jáne mol ónim beretin daqyldar ósirýge kóshý jumystary josparly túrde júrgizilip keledi. Maily daqyldar ósiretin egis kólemi shamamen 4 ese ulǵaiyp, 3,5 million gektarǵa jetti. Memleket basshysynyń aitýynsha, bul oń nátijege kúndelikti eseli eńbegimen elimizdiń azyq-túlik qaýipsizdigin nyǵaitýǵa zor úles qosyp júrgen aýyl azamattarynyń arqasynda jetip otyrmyz.
Sonymen qatar Prezident agrarlyq saladaǵy birqatar túitkildi máseleni ashyq talqylaý aiasynda qarastyrýdy usyndy.
Kezdesý barysynda Aýyl sharýashylyǵy ministri Erbol Qarashókeev, kópsalaly «Rodina» kásipornynyń direktory Ivan Saýer, «Olja Agro» JShS-niń bas direktory Aidarbek Qojanazarov, «Zenchenko jáne K» sharýa seriktestiginiń direktory Gennadii Zenchenko, «Maily daqyldardyń tájiribelik sharýashylyǵy» JShS-niń direktory Farid Ábitaev sóz sóiledi.
Olar óndiristi ártaraptandyrý, shikizatty tereń óńdeý jáne jańa agroónimderdi óndirý, qant salasyn damytý, tuqym sharýashylyǵy, mal sharýashylyǵy jáne veterinariia, sondai-aq ishki naryqty qamtamasyz etip, eksporttyq áleýetti arttyrý máselelerin qozǵady.
Jiyn barysynda agroónerkásip keshenin damytýǵa qarajat bólý men paidalanýdyń tiimdiligi, jer jáne sý resýrstaryn ádil bólý máselelerine de erekshe nazar aýdaryldy.
Agrarlyq biznes ókilderi aýyldarda ómir súrý sapasyn arttyrý, jol-kólik jáne áleýmettik infraqurylymnyń, onyń ishinde mektepter men balabaqshalardyń jaǵdaiyn jaqsartý, sondai-aq kadr daiarlaý qajettigin atap ótti.
Prezident baiandamalardy tyńdap, Úkimetke aitylǵan barlyq usynysty nazarǵa alýdy jáne kásipkerlerdiń pikirin eskere otyryp, aýyl sharýashylyǵynyń jai-kúiine muqiiat taldaý júrgizýdi tapsyrdy. Memleket basshysynyń pikirinshe, agroónerkásip kesheni ókilderimen mundai kezdesýlerdi turaqty túrde ótkizip turý kerek. Sebebi aýyl sharýashylyǵyndaǵy máselelerdiń sheshimin tabýy - azamattardyń ómir súrý sapasyna ǵana emes, sonymen qatar eldiń azyq-túlik qaýipsizdigine de yqpal etedi.
