Qasym-Jomart Toqaev «Altyn júrek» eskertkishiniń ashylý rásimine qatysty, dep habarlaidy "Ult aqparat" Aqordanyń resmi saityna silteme jasap.
Memleket basshysy koronavirýs indetine qarsy kúreske zor úles qosqan meditsina qyzmetkerlerine arnap turǵyzylǵan «Altyn júrek» eskertkishiniń ashylý rásimine qatysty. Eskertkish elordanyń sol jaǵalaýynda Almaty men Aqmeshit kósheleriniń qiylysyndaǵy jańa saiabaqtyń aýmaǵynda ornalasqan.
Prezident saltanatty lentany qiyp, eskertkishke gúl shoǵyn qoidy. Sodan keiin ashylý rásimine jinalǵan meditsina qyzmetkerleriniń aldynda sóz sóiledi.
Qasym-Jomart Toqaev óz sózinde «Altyn júrek» eskertkishiniń ashylýy asa qaýipti indetpen betpe-bet kelgen otandastarymyzdyń yntymaǵy men birligin kórsetetinin atap ótti. Memleket basshysy dárigerlerge arnap eskertkish ornatý týraly tapsyrmany byltyr «Biz birgemiz» jalpyulttyq onlain-forýmynda bergen edi.
– Bul – jahandyq dertke qarsy kúresken otandastarymyzǵa degen el qurmetiniń belgisi. Sondai-aq halyqtyń adal perzentterine ystyq yqylasynyń kórinisi. Eskertkish el basyna qiyndyq týǵan sátte qaharmandyq kórsetken jandardyń rýhyna taǵzym etý ornyna ainalady, – dedi Prezident.
Memleket basshysy densaýlyq saqtaý salasynda jumys isteitin 10 myńǵa jýyq qyzmetker koronavirýs juqtyryp, onyń 200-den astamy qaitys bolǵanyn jetkizdi.
Byltyr Qazaqstan Prezidentiniń Jarlyǵymen «Halyq alǵysy» medali bekitilip, pandemiiaǵa qarsy kúreste alǵy shepte bolǵan kóptegen otandasymyz marapattaldy. Prezidenttiń aitýynsha, bul olardyń qajyrly eńbegi men eren erligine degen halyqtyń ystyq yqylasynyń belgisi. Marapatqa ie bolǵan azamattardyń kópshiligi densaýlyq saqtaý salasynyń qyzmetkerleri.
Qasym-Jomart Toqaev pandemiia kezinde memleket tarapynan dárigerler men jalpy meditsina qyzmetkerlerin qoldaýǵa baǵyttalǵan yntalandyrý sharalary toptamasy qabyldanǵanyn aitty.
– Koronavirýspen kúreske atsalysqan dárigerlerge tólenetin tek ústemeaqy men saqtandyrý járdemaqylary úshin 180 milliard teńgege jýyq qarjy bólindi. Úkimet biylǵy qazan aiyna deiin tólemaqy berýdi jalǵastyrý úshin osy maqsatqa qosymsha 71,5 milliard teńge bóledi. Biz dárigerlerdiń eńbekaqysyn kezeń-kezeńimen arttyrýdy bastadyq. Bul úrdis jalǵasa beredi, – dedi Memleket basshysy.
Prezident óz sózinde meditsina qyzmetkerlerin áleýmettik turǵydan qorǵaýdyń tiimdi júiesin qurý mańyzdylyǵyna nazar aýdardy.
– Bul júiede aýyldyq jerge kelgen mamandarǵa mindetti túrde turǵyn úi berý, birjolǵy járdemaqy tóleý jáne basqa da jeńildikter qamtylǵan. Mundai sharalar oblystar men qalalar ákimderiniń belsendi atsalysýymen elimizdiń barlyq óńirinde qabyldanýǵa tiis, – dedi Qasym-Jomart Toqaev
Sonymen qatar Prezident tek qarjylai yntalandyrýdyń jetkiliksiz ekenin aitty.
– Meditsina qyzmetkerleriniń moraldyq jáne zańdyq jaýapkershiligi artyp keledi. Azamattar tarapynan qoiylatyn talap ta joǵary. Kóptegen maman qysymǵa shydamai, kásibi turǵydan qajyp, densaýlyq saqtaý salasynan bas tartýda. Ókinishke qarai, bul alańdatarlyq jaǵdai. Atalǵan úrdis elimizde ǵana oryn alyp otyrǵan joq. Sondai-aq búkil álemde bes millionnan astam dáriger jetispeidi. Osy oraida meditsina qyzmetkerleriniń quqyqtyq jáne áleýmettik turǵydan qorǵalýyn birtindep kúsheitý qajet. Meniń tapsyrmam boiynsha jyl sońyna deiin meditsina qyzmetkerleriniń kásibi jaýapkershiligin saqtandyrý júiesi iske qosylady, – dedi Memleket basshysy.
Prezident meditsina qyzmetkerleriniń qoǵamdaǵy mártebesin arttyrý úshin «Qazaqstan Respýblikasynyń eńbek sińirgen dárigeri» ataǵyn engizýdi usyndy. Ataqpen birge materialdyq syiaqy da beriledi. Onyń kólemin Úkimet belgileidi.
Qasym-Jomart Toqaev densaýlyq saqtaý júiesinde qyzmet etý óskeleń urpaq úshin mártebeli ári tartymdy bolýy tiis dep sanaidy.
Sonymen qatar Prezident orta deńgeidegi meditsina qyzmetkerlerine qoldaý kórsetý máselesine toqtaldy. Onyń pikirinshe, olar densaýlyq saqtaý júiesiniń basty resýrsy jáne jumystyń negizgi bóligin atqarady.
– Bizge meiirgerlerdiń jańa býynyn qalyptastyrý qajet. Olar tek oryndaýshylar ǵana emes, kóp salaly emdeý tobynyń jaýapkershilik júktelgen teń quqyqtyq músheleri bolýy tiis. Osy oraida olardyń kásibi daiyndyǵynyń deńgeiin birtindep kóterip, meiirgerlik isiniń mártebesin arttyrý qajet, – dedi Memleket basshysy.
Prezident óz sózinde Elbasynyń bastamasymen iske asyrylǵan «Biz birgemiz» aktsiiasy aiasynda pandemiiaǵa qarsy kúreske zor úles qosqan eriktiler men metsenattardyń qyzmetin atap ótti.
Qasym-Jomart Toqaev barsha meditsina qyzmetkerlerin kásibi merekesimen quttyqtap, «Altyn júrek» eskertkishi ornalasqan saiabaqty «Dárigerler alleiasy» dep ataýdy usyndy. Memleket basshysy jańadan ashylǵan keshen aq halatty abzal jandarǵa degen halyq alǵysynyń belgisi bolatynyna senim bildirdi.
Jiyn sońynda Memleket basshysy meditsina qyzmetkerlerimen áńgimelesti. Dárigerler kórsetilip jatqan qoldaýǵa alǵys aitty.
