Qazaqstan Prezidenti Qasym-Jomart Toqaev Ile Alataýynyń bókterinde alma baqtaryn saqtaý máselesin erekshe baqylaýǵa alýdy tapsyrdy, dep habarlaidy QazAqparat.
«Bul – aiýandyq. Mundaiǵa jol berilmeýi kerek. Ókinishke qarai, bul tiisti organdardyń salǵyrttyǵy saldarynan bolyp otyr. Ile Alataýynyń bókterinde alma baqtaryn saqtaý jáne ósirý máselesi erekshe baqylaýǵa alynýy kerek. Bul – Almaty qalasy men búkil Qazaqstannyń igiligi ǵoi. Qala mańyndaǵy tabiǵatty qorǵaý aimaqtaryna túgendeý júrgizip, olardy paidalanýdyń qatań rásimderin belgileý qajet. Ákimdik qalany kógaldandyrý jáne aty ańyzǵa ainalǵan Almaty aportyn qalpyna keltirý jumystaryn jandandyrýy tiis. Áigili Botanikalyq baqty – qalamyzdyń ózindik simvolyn qalpyna keltirý qajet», - dedi Memleket basshysy Almatyny áleýmettik-ekonomikalyq damytýǵa arnalǵan otyrysta.
Aita keteiik, budan buryn Almaty taýynda qara topyraqty urlaý faktileri anyqtalǵan edi.
Sondai-aq, politsiia Almatydaǵy jeke alma baqtaryn shaýyp tastaý faktilerin tergep jatyr.
