Foto: Akorda.kz
Memleket basshysy Aqtóbe oblysynyń investitsiialyq áleýetimen tanysty, dep habarlaidy "Ult aqparat" Aqordanyń resmi saityna silteme jasap.
Aqtóbe oblysyna jumys sapary aiasynda Prezidentke aimaq basshysy Ashat Shaharov óńirdiń ekonomikalyq áleýeti men perspektivti investitsiialyq jobalary týraly baiandady.
Oblys ákiminiń aitýynsha, biylǵy 10 aida óńir ekonomikasyna 804,4 milliard teńge investitsiia tartylǵan. Bul kórsetkish ótken jyldyń osy kezeńimen salystyrǵanda 8,2 paiyzǵa kóp. Salynǵan qarjynyń negizgi bóligi, iaǵni 725,5 milliard teńge jeke investorlarǵa tiesili. Sonyń ishinde óńdeý ónerkásibine 62,6 milliard teńge, metall kenin igerýge 145,6 milliard teńge quiylǵan.
Biyl jalpy somasy 57,2 milliard teńge bolatyn 19 iri jobany iske qosý josparlanǵan. Barlyq investitsiialyq joba úshin jasyl dáliz qaǵidaty engizilgen.
Sondai-aq Prezidentke birqatar infraqurylymdyq joba ázirlengeni týraly málimet berildi. Qazir Aqtóbe – Qarabutaq – Ulǵaisyn avtojolynyń jobalyq-smetalyq qujattary daiyndalyp jatyr.
Sodan keiin Memleket basshysyna Aqtóbede káriz júiesin tazartý qondyrǵysyn salý jónindegi joba tanystyryldy. Quny 53,5 milliard teńge bolatyn jobany iske asyrý úshin Eýropalyq qaita qurý jáne damý bankinen qarjy tartylmaq.
Qasym-Jomart Toqaevqa Aqtóbe qalasyna «Buhara – Oral» magistraldy gaz qubyrynan úshinshi jelini tartý jumystary jóninde baiandaldy. Jobanyń júzege asyrylýy qoldanystaǵy gaz qubyrlarynyń júktemesin azaitýǵa múmkindik beredi.
Memleket basshysy Aqtóbe oblysynyń ákimine ekologiia máselesin tez arada sheshýdi tapsyrdy.
– Bul jumysty mindetti túrde sońyna deiin jetkizýimiz kerek. Áitpese, halyqqa ziiany kóp. Ekologiia máselesi óte ótkir ári ózekti. Sondyqtan bul máselege basa mán berý qajet, – dedi Prezident.
Budan bólek, iri kompaniialardyń ókilderi Memleket basshysyna ózderiniń investitsiialyq jobalaryn tanystyrdy.
Atap aitqanda, ERG bas direktory Serik Shahajanov Aqtóbe oblysynda Ekologiialyq strategiianyń iske asyrylýy jóninde baiandady. Osy maqsatta 2030 jylǵa deiin 228 milliard teńge kóleminde investitsiia quiý josparlanyp otyr. Atalǵan Strategiia sheńberinde Aqtóbe ferroqorytpa zaýytyndaǵy №1, 2 balqytý tsehtarynyń gaz tazartý júiesin jańǵyrtý jumystary aiaqtaldy.
«SNPS-Aqtóbemunaigaz» AQ bas direktory Li Shýfen Qasym-Jomart Toqaevqa munai men gazdy daiyndaý isinde zamanaýi tehnologiianyń eń joǵary standarttaryna sai keletin Jańajol munai-gaz óńdeý keshenine qarasty Úshinshi gaz óńdeý zaýytynyń (GÓZ-3) birinshi, ekinshi jáne úshinshi kezekte júzege asyrylatyn jobalary týraly aitty. Jalpy investitsiia kólemi – 3,5 trillion teńge.
Eni Plenitude Arm Wind kompaniiasynyń basqarýshy direktory Aleks Stillavato Qasym-Jomart Toqaevqa Qazaqstan aýmaǵynda iske asyrylǵan jobalar týraly aqparat berdi. Atap aitqanda, kásiporyn Aqtóbe oblysynda «Badamsha-1», «Badamsha-2» jel elektr stantsiialarynyń, Túrkistan oblysy Sháýildir kentiniń janynda qýaty 50 MVt bolatyn birinshi kún elektr stantsiiasynyń qurylysyn júzege asyrǵan. Sondai-aq ol Mańǵystaý oblysy Jańaózen qalasynyń mańynda «QazMunaiGaz» UK aktsionerlik qoǵamymen birlesip, qýaty 250 MVt bolatyn Jańartylatyn energiia kózderi+Gaz gibridti elektr stantsiiasynyń jobasy ázirlenip jatqanyn aitty.
KazFeltec JShS basshysy Erlan Jańabergenov Memleket basshysyna qoi júninen ekologiialyq taza ári jylý saqtaityn materialdar shyǵaratyn zaýytty iske qosý jobasyn tanystyrdy. Nysanǵa jalpy kólemi 5,3 milliard teńge investitsiia salý kózdelip otyr.
AqtobeCem kompaniiasynyń bas direktory Stanislav Sherbakov Qasym-Jomart Toqaevqa Aqtóbe oblysynda jalpy somasy 70 milliard teńge bolatyn tsement klinker óndiretin zaýyttyń jobasyn usyndy.
«QazaqBitým» kompaniiasynyń baqylaýshy keńesiniń tóraǵasy Bekjan Mamyt Prezidentke somasy 32,2 milliard teńgeni quraityn bitým zaýyty-terminalyn salý jobasy týraly aitty.
Kezdesý sońynda Memleket basshysy kásipkerlerdiń qolǵa alǵan jobalarynyń tabysty júzege asyrylýyna tilektestik bildirdi.
