Prezident Pavlodar oblysyna jumys sapary aiasynda 85 jyl buryn irgesi qalanǵan Abai atyndaǵy daryndy balalarǵa arnalǵan gimnaziiaǵa bardy, dep habarlaidy "Ult aqparat" Aqordanyń baspasóz qyzmetine silteme jasap.
Mektep direktory Saltanat Shabajanova Qasym-Jomart Toqaevqa oqý ornynyń tereń tarihy týraly aqparat berip, gimnaziianyń jańartylǵan kabinetterin kórsetti.
Oqýshylar mektep kitaphanasynda Memleket basshysyna Ramazan Toqtarovtyń shyǵarmashylyǵy boiynsha «Oqýǵa qushtar mektep» jobasyn tanystyryp, jazýshynyń «Ertis muhitqa quiady» atty kitabyn syiǵa tartty.
Sodan keiin Prezident respýblikalyq jáne halyqaralyq pán olipiadalarynyń jeńimpazdary men júldegerlerin daiyndaǵan Pavlodar oblysynyń pedagogtarymen áńgimelesti.
Qasym-Jomart Toqaev olardy Dúniejúzilik Ustaz kúnimen jáne qazaqstandyq pedagogtardyń ótken kásibi merekesimen, al gimnaziia ujymyn mereitoiymen quttyqtady.
– Muǵalim bolý – eń abyroily eńbek. Sonymen birge bul – óte jaýapty jumys. Ustazdyq – qasietti qyzmet desek te artyq emes. Sebebi ár shákirttiń tulǵa bolyp qalyptasýynda ustazdyń orny erekshe, – dedi Memleket basshysy.
Qasym-Jomart Toqaev Pavlodar oblysy ulttyń qaita órleý ortalyqtarynyń biri ekenin atap ótti. Onyń aitýynsha, qazaqstandyq kóptegen tanymal ǵalym osy óńirde ósken jáne qazirgi pedagogtar aǵa baýynnyń izin jalǵap keledi.
– Jastarymyzdyń otanshyl, ádil, adal jáne eńbekqor bolyp ósýine ustazdyń qosatyn úlesi orasan zor. Biz jastardyń eńbekke qulshynysyn arttyrýymyz qajet. Ádiletti Qazaqstanda eńbek adamy eń birinshi orynda turady. Sebebi otanshyldyq, eń aldymen, týǵan elińiń igiligi úshin qyzmet etý degen sóz. Ol úshin, árine, eńbekqor, isker bolý kerek. Árkim óz bolashaǵyna ózi jaýapty ekenin jastar bala kezden tereń uǵynyp ósýge tiis. Bul ideialardyń bárin balalardyń sanasyna mindetti túrde sińirý kerek. Uly Abai aitqan «Tolyq adam» uǵymy – bolmysy kemel, kózqarasy tereń, kókiregi oiaý, eńbekqor adam degendi bildiredi. Halqymyz «Ustazy jaqsynyń – ustamy jaqsy» beker aitpaǵan, – dedi Qasym-Jomart Toqaev.
Memleket basshysy Cherchilldiń «Muǵalimderde memleket basshylary armandaityn bilik bar» degen sózin tilge tiek etip, mektepterde jeke adamnyń da, tutas memleketterdiń de shynaiy básekelestik negizi qalanatynyn atap ótti.
Qasym-Jomart Toqaev qoǵamdyq jáne jeke qundylyqtar júiesin qaita jańǵyrtý kerek ekenin aitty. Prezidenttiń aitýynsha, biz ulttyq dástúrlerimizdi saqtai otyryp, qoǵamda progressivti uǵymdardy belsendi dáripteýimiz qajet. Bul – eńbekqorlyq, bilim kýlti, ózara syilastyq, yntymaqtastyq, senim, iskerlik, uqyptylyq, syni oilaý syndy qasietter.
Prezident ulttyń jańa qarym-qabiletterin qalyptastyrýda jáne Ádiletti Qazaqstandy qurýda muǵalimder sheshýshi ról atqaratynyna senim bildirdi.
Pavlodar oblysynyń pedagogtar qaýymynyń atynan №8 orta mektep-litseiiniń orys tili men ádebieti pániniń muǵalimi Irina Shevchenko jáne Muzafar Álimbaev atyndaǵy orta mekteptiń mýzyka pániniń muǵalimi Baqythan Orazbek sóz sóiledi.
