Búgin Prezident Qasym-Jomart Toqaevtyń Qazaqstan halqyna Joldaýynda berilgen tapsyrmalaryn túsindirý jáne oryndaý jónindegi jumys sapary aiasynda Premer-Ministrdiń orynbasary Eraly Toǵjanov bastaǵan úkimettik delegatsiia Shymkent qalasynyń áleýmettik nysandaryn aralady, dep habarlaidy Qazaqstanda koronavirýstyń taralýyna jol bermeý jónindegi vedomstvoaralyq komissiianyń Telegram paraqshasy.
Vedomstvoaralyq komissiianyń kóshpeli otyrysynda Vitse-Premer respýblika boiynsha vaktsinatsiiamen qamtýdyń joǵary qarqynynyń arqasynda Shymkent qalasyndaǵy epidemiologiialyq ahýaldyń turaqtanǵany týraly atap ótti. Sonymen qatar Eraly Toǵjanov ákimdiktiń aldyna memlekettik densaýlyq saqtaý baǵdarlamasynyń barlyq maqsatty indikatorlaryna qol jetkizý qajettiligi týraly mindet qoidy. Sondai-aq, oqý jylynyń dástúrli formatta bastalýyna bailanysty mektepterde sanitariialyq normalardy saqtaý jumystaryn kúsheitý tapsyryldy.
Qalanyń meditsinalyq mekemeleri ujymdarymen kezdesý barysynda E. Toǵjanov memlekettiń qarjylyq qoldaýynyń arqasynda meditsinalyq mekemeler azamattarǵa sapaly meditsinalyq kómek kórsetý úshin zamanaýi jabdyqtarmen qamtamasyz etilgenin atap ótti.
«Nizamhan» jeke mektebin aralaý barysynda Eraly Toǵjanov Shymkent qalasyndaǵy jeke mektepter jelisin damytý boiynsha jumysqa oń baǵa berip, osy baǵyttaǵy jumysty jalǵastyrýdy tapsyrdy.
Prezident Joldaýynda eldegi biologiialyq qaýipsizdikti jáne naryqty otandyq dári-dármektermen qamtamasyz etýdi tapsyrdy. «Himfarm» AQ, «KazMedPribor» JShS aralaý barysynda memlekettik organdarǵa otandyq óndirýshilerge qoldaý kórsetý boiynsha naqty tapsyrmalar berildi. Sapar sońynda vitse-premer Toǵjanov qala basshylyǵyna birqatar tapsyrma berdi.
