16 naýryz kúni Memleket basshysynyń tapsyrmasy boiynsha QR Premer-Ministriniń orynbasary Eraly Toǵjanov bastaǵan jumys toby Túrkistan oblysynyń shekara mańyndaǵy aýdandaryn aralady, dep habarlaidy primeminister.kz.
Jumys sapary barysynda E. Toǵjanov Túrkistan oblysy Saryaǵash aýdanynyń Baǵys jáne Hiiabon aýyldarynyń áleýmettik nysandarynyń jaǵdaiymen tanysyp, turǵyndarymen kezdesti. Vitse-premermen kezdesýde turǵyndar aýyldardyń ózekti máselelerin kóterdi, onyń ishinde múlik pen jer ýchaskelerin tirkeý múmkindiginiń joqtyǵyn aitty. Aýyl turǵyndarynyń aitýynsha, eginshilik pen mal sharýashylyǵyna arnalǵan jerler men sýdyń jetispeýshiligi ótkir másele bolyp otyrǵan kórinedi. Sonymen qatar aýyldarda gazdyń joqtyǵy baiqalady.
Kezdesý qorytyndysy boiynsha Premer-Ministrdiń orynbasary oblys ákimdigine turǵyndardyń kóterip otyrǵan máselelerin sheshý boiynsha barlyq qajetti sharalardy qabyldaýdy tapsyrdy. Osylaisha, osy jyldyń 1 sáýirine deiin aýyl sharýashylyǵy jerlerine olardyń sýmen qamtamasyz etilýin eskere otyryp túgendeý jumystarynyń júrgizilýi, aýyl turǵyndarynyń jer ýchaskeleri men turǵyn úilerin tirkeýdi 31 mamyrǵa deiin aiaqtaý, sondai-aq 1 qyrkúiekke deiin Túrkistan oblysynyń 6 aýylyn gazben qamtamasyz etý tapsyryldy.
Eraly Toǵjanov atalǵan eldi mekenderdiń shekaralaryn aiqyndaýdyń mańyzdylyǵyn atap ótip, oblys basshylyǵyna biylǵy 15 sáýirge deiin jergilikti halyqtyń qajettiligi úshin jaiylymdyq jerlerdi anyqtaý boiynsha tiisti jumystardyń júrgizilýin, al 20 sáýirge deiin aýyl shekarasyn túpkilikti bekitýdi tapsyrdy. Sonymen qatar Baǵys aýylynda apatty mekteptiń ornyna jańa ǵimarat salyp, internet sapasyn kóterý úshin «Kcell» jáne «Tele-2» jelilerin jańǵyrtyp, 3G/4G bailanysymen qamtý josparlanýda. Shekara mańyndaǵy aýyldardy damytý máseleleri Úkimettiń baqylaýynda.
