Foto: ©Tengrinews.kz
Amanqaraǵai turǵyndary aýylǵa oralyp jatyr. Jurt úiindilerden órtten aman qalǵan zattardy tabamyz dep úmittenedi, - dep habarlaidy Tengrinews.kz agenttigi.
Amanqaraǵailyq Rahmetovter otbasy jaqyn mańdaǵy qańyrap bos turǵan úide turady, onyń iesi órtten zardap shekkenderdiń jaǵdaiyn túsinip, olarǵa ýaqytsha turýǵa úiin bergen. Bir qyzyǵy, tozyǵy jetken úi órtten aman qalǵan. Eki úidiń arasy bir-eki metr ǵana. Bisembai Rahmetov temirjolda jumys isteidi, oǵan jańa forma berilgen, eskisi úiimen qosa órtenip ketken. Er adam basynan ótkergen jaitty esine alyp, bári satyp alynatynyn, biraq janýarlarǵa obal bolǵanyn aitady.
"Júz taýyq tiridei órtenip ketti, tek átesh aman qaldy. Aidary ǵana kúiip qaldy. Qoilardy aman alyp qaldym. Sol kezde bári janyp jatqanda, olardyń arasynda kári qoi bar edi, men ony "Maimyl" dep ataimyn. Shaqyrǵan edim ol artymnan erdi, onyń artynan bári aqbókender siiaqty sekirip shyqty. Sosyn olarǵa "osynda turyńdar" dedim, men gipnozdap qoiǵandai aýladan velosipedimdi alǵansha qozǵalmai turdy. Sosyn ulym kelip aidap áketti", - deidi Bisembai Rahmetov kózine jas alyp.
Otbasy Amanqaraǵai aýylynyń shetinde turady, ainalasy qaraǵaily orman bolatyn. Rahmetovter týystary men balalary osy jerge merekelerde jii jinalatynyn aitty. Qazir ainala kúiip, aǵashtyń dińderi men órtengen egistik jer ǵana qalǵan. Qazir ainalada tabiǵat ta, úi de joq. Tipti kiim-keshek úshin gýmanitarlyq kómek qabyldaý ortalyǵyna barýǵa týra keldi.
