Óskemen qalasynda politsiiaǵa jalǵan habar bergen er adam jaýapqa tartyldy, dep habarlaidy QazAqparat.
Qalalyq politsiia basqarmasy baspasóz qyzmetiniń málimetine súiensek, «102» jedel arnasyna jergilikti turǵyn qońyraý shalǵan. Óz sózinde ol shahardaǵy ǵimarattardyń birin terrorister basyp alǵanyn jetkizdi.
Oqiǵa ornyna tártip saqshylary jedel kelip jetken. Alaida bul habar shyndyqqa janaspaityn bolyp shyqty. Politsiia qyzmetkerleri qońyraý shalǵan adamdy birden anyqtaǵan. Ol Óskemenniń 35 jastaǵy turǵyny bolyp shyqty.
- Er adam mas bolǵandyqtan jáne ózine nazar aýdarý úshin qońyraý shalǵanyn aitty. Oǵan qatysty arnaiy qyzmetterdi kórineý jalǵan shaqyrǵany úshin QR ÁQBtK-niń 438-baby boiynsha is qozǵalyp, 30 ailyq eseptik kórsetkish mólsherinde aiyppul salyndy, - dedi basqarma bastyǵy Andrei Mýla.
