Teris dini aǵymnyń yqpalyndaǵy jastar ásker qataryna alynbaidy. Muny Ulttyq Qaýipsizdik komitetiniń ózi qatań qadaǵalaityn boldy. Qorǵanys ministrliginiń ókilderi osylai dep otyr. Kóktemgi shaqyrtýdyń bastalýyna orai jýrnalisterdi jinaǵan vedomostvo shendileri áskerdegi álimjettik pen sarbazdarǵa berilgen jańasha jeńildik týraly da aityp ótken, - dep habarlaidy "Ult aqparat" 31-arna-ǵa silteme jasap.
Bolashaq sarbazdardy fizikalyq jáne moraldyq-psihologiialyq jaǵynan tekserý óz aldyna, endi olardyń dini kózqarasy da eskeriledi. Bul baǵytta áskeriler ishki ister ministrligi men ózge de kúshtik qurylymdardyń kómegine júginedi eken.
MÚSLIM DAIYROV, QR QK Bas shtaby uiymdastyrý-jumyldarý jumystary departamentiniń basshysy:
- Dástúrli emes dini toptar men ekstremistik toptarǵa qatysty iste bizge Ulttyq Qaýipsizdik komiteti kómektesedi.
Naqtylai ketsek, qazir shaqyrtylyp jatqan jastardyń bárin arnaiy qyzmet ókilderi 3 ai buryn teksere bastapty. Bul synaqtardan ótip, jaýynger atanǵandar úshin kelesi másele - álimjettik bolary sózsiz.
TILEÝHAN BASQOJAEV, QR QK áskeri politsiiasy bas basqarmasynyń basshysy:
- Biyl qarýly kúshterde 86 qylmys tirkelgen. Sonyń siz aityp otyrǵan álimjettigi bar, qatardaǵy jaýyngerler, ekeýi solarmen bailanysty. Sonda paiyzben aitsaq 2,3 paiyz. Tirkelgen osy 2 fakt.
Qasynda otyrǵan generaldyń túrtkeninen keiin sózin qysqa qaiyrǵan polkovnik, ári qarai bul taqyrypty jyly jaba saldy. Esesine, ministrlik shendileri "birdi-ekili jait bolmasa, áskerde burynǵydai júieli álimjettik joq" dep sendirip baqty. Sarbazdar úshin barlyq jaǵdai jasalǵan deidi. Tipti jańa buiryqqa sáikes, jaýyngerlerge uialy telefon ustaýǵa bolmaidy degen tyiym alynyp tastalypty.
MÚSLIM DAIYROV, QR QK Bas shtaby uiymdastyrý-jumyldarý jumystary departamentiniń basshysy:
- Jeke ýaqyt deidi ǵoi. Keshki ýaqytta 1 saǵat, 1 jarym saǵattai telefondaryn alyp, zvondaidy. Buryn bolyp edi, sypyryp alyp, seifke tyǵyp qoiyp. Kúnde alady.
Biyl kóktemde 16 myń bozbala qarýly kúshter qataryn toltyrmaq eken. Bul - barlyq áskeri qyzmetkerdiń 30 paiyzyna teń. Ministrlik ókilderi merzimdik boryshyn óteýden bas tartyp, biryńǵai kelisim shart boiynsha jaýynger jinaýǵa áli erte dep otyr. Óitkeni, jumyldyrýǵa qajetti azamattar sanyn kóbeitýdi prezidenttiń ózi tapsyrǵan.
