«Tentek kádeniń» sońy daýǵa ulasty. Dástúrdi oryndamaq bolǵan er adam qudasynan syilyqtyń ornyna soqqy alǵan. Áleýmettik jelilerde taraǵan aqparatqa sáikes, oqiǵa Oral qalasynda bolǵan, dep habarlaidy ult.kz.
Áleýmettik jelide taraǵan videoda «tentek káde» suraǵan er adamdy ekinshi adamnyń bir uryp qulatqany kórinedi. Keiin videoǵa qosa oqiǵanyń mán-jaiy baiandalǵan aýdiojazba da taraǵan.
Aýdio avtorynyń aitýynsha, toi kezinde aýyldyń «tentekteri» keipindegi birneshe adam ony ortaǵa súirep shyǵaryp, káde suraǵan. Alaida bul áreket qudasyna unamai, olardyń birine soqqy jasaǵan.
«Talyp qalyp, 40 minýttan keiin travmpýnkte esin jiǵan. Zaiavlenie jazyp tastap, sonymen isti bolǵan jaidaiym bar. Biraq sheshilgendei boldy áiteýir. Jigittermen baryp, keshirimimizdi alyp, kishkene tiyn-tebenin berip… Tisi ketken, kafelge qulaǵanda qabyrǵasy synǵan. Sosyn basy jarylǵan. Biraq, shúkir. Michýrinde synyqshy bar eken. Soǵan aparyp kelgen eken», – deidi aýdio avtory.
Onyń sózinshe, er adam soqqydan keiin birneshe jaraqat alǵan. Alaida bul aqparattyń ras-ótirigin ázirge resmi organdar rastaǵan joq.
Oqiǵanyń naqty qashan bolǵany jáne oǵan qatysty qandai da bir quqyqtyq sheshim qabyldanǵany týraly ázirge resmi málimet joq.
Batys Qazaqstan oblysynyń politsiia departamenti men oblystyq densaýlyq saqtaý basqarmasy oqiǵaǵa qatysty pikir bildirmedi.
