Qazaqstandyq Zarina Diias Aýstraliia ashyq chempionatyn jeńispen bastady, – dep habarlaidy QazAqparat.
Dúniejúzilik reitingte 73-orynda turǵan Z.Diias alǵashqy ainalymda álemniń 24-inshi, osy jarystyń 21-raketkasy, amerikalyq Amanda Anisimovamen kezdesti. Qazaqstandyq tennisshi 26-da bolsa, qarsylasy nebári 18-de edi. Zarina birinshi partiiada óz basymdylyǵyn kórsete bildi – 6:3.
Esesine ekinshi sette esep 1:1 bolǵan mezette Amanda breik jasai aldy. Sosyn Zarina da breik jasaǵanymen, esepti 5:2-ge jetkizdi. Z.Diias esepti qysqartqanymen, A.Anisimova múmkindigin jibermedi – 6:4.
Úshinshi, sheshýshi partiiada amerikalyq sportshy breikpen alǵa shyqty – 2:1. Degenmen buǵan Zarina qos birdei breikpen jaýap qaiyrdy – 4:2. Aqyry ol osy basymdylyǵynan aiyrylǵan joq – 6:3. Tartysty báseke 1 saǵat 47 minýtqa sozyldy.
Z.Diias ekinshi ainalymda álemniń 58-raketkasy, reseilik Anna Blinkova nemese reitingte 96-oryndaǵy italiialyq Iasmin Paolinidiń bireýimen sheberlik baiqasady.
Taǵy bir qazaqstandyq, reitingte 38-oryndaǵy Iýliia Pýtintseva álemniń 37-raketkasy, taibeilik Se Shýveimen oinap jatyr. Ótken jylǵy Aýstraliia chempionatynda Z.Diias bastapqy kezdesýinde-aq súrinse, Iýliia Pýtintseva ekinshi ainalymnan asa almaǵan edi. Al Qazaqstannyń qazirgi birinshi raketkasy Elena Rybakina qatyspaǵan bolatyn.
Eske sala keteiik, budan buryn E.Rybakinanyń Aýstraliia ashyq chempionatynyń ekinshi ainalymyna shyqqanyn, al Mihail Kýkýshkin men Aleksandr Býbliktiń jeńilip qalǵanyn jazǵan bolatynbyz.
