قازاقستاندىق زارينا ديياس اۋسترالييا اشىق چەمپيوناتىن جەڭٸسپەن باستادى, – دەپ حابارلايدى قازاقپارات.
دٷنيەجٷزٸلٸك رەيتينگتە 73-ورىندا تۇرعان ز.ديياس العاشقى اينالىمدا ەلەمنٸڭ 24-ٸنشٸ, وسى جارىستىڭ 21-راكەتكاسى, امەريكالىق اماندا انيسيموۆامەن كەزدەستٸ. قازاقستاندىق تەننيسشٸ 26-دا بولسا, قارسىلاسى نەبەرٸ 18-دە ەدٸ. زارينا بٸرٸنشٸ پارتييادا ٶز باسىمدىلىعىن كٶرسەتە بٸلدٸ – 6:3.
ەسەسٸنە ەكٸنشٸ سەتتە ەسەپ 1:1 بولعان مەزەتتە اماندا برەيك جاساي الدى. سوسىن زارينا دا برەيك جاساعانىمەن, ەسەپتٸ 5:2-گە جەتكٸزدٸ. ز.ديياس ەسەپتٸ قىسقارتقانىمەن, ا.انيسيموۆا مٷمكٸندٸگٸن جٸبەرمەدٸ – 6:4.
ٷشٸنشٸ, شەشۋشٸ پارتييادا امەريكالىق سپورتشى برەيكپەن العا شىقتى – 2:1. دەگەنمەن بۇعان زارينا قوس بٸردەي برەيكپەن جاۋاپ قايىردى – 4:2. اقىرى ول وسى باسىمدىلىعىنان ايىرىلعان جوق – 6:3. تارتىستى بەسەكە 1 ساعات 47 مينۋتقا سوزىلدى.
ز.ديياس ەكٸنشٸ اينالىمدا ەلەمنٸڭ 58-راكەتكاسى, رەسەيلٸك اننا بلينكوۆا نەمەسە رەيتينگتە 96-ورىنداعى يتالييالىق ياسمين پاولينيدٸڭ بٸرەۋٸمەن شەبەرلٸك بايقاسادى.
تاعى بٸر قازاقستاندىق, رەيتينگتە 38-ورىنداعى يۋلييا پۋتينتسەۆا ەلەمنٸڭ 37-راكەتكاسى, تايبەيلٸك سە شۋۆەيمەن ويناپ جاتىر. ٶتكەن جىلعى اۋسترالييا چەمپيوناتىندا ز.ديياس باستاپقى كەزدەسۋٸندە-اق سٷرٸنسە, يۋلييا پۋتينتسەۆا ەكٸنشٸ اينالىمنان اسا الماعان ەدٸ. ال قازاقستاننىڭ قازٸرگٸ بٸرٸنشٸ راكەتكاسى ەلەنا رىباكينا قاتىسپاعان بولاتىن.
ەسكە سالا كەتەيٸك, بۇدان بۇرىن ە.رىباكينانىڭ اۋسترالييا اشىق چەمپيوناتىنىڭ ەكٸنشٸ اينالىمىنا شىققانىن, ال ميحايل كۋكۋشكين مەن الەكساندر بۋبليكتٸڭ جەڭٸلٸپ قالعانىن جازعان بولاتىنبىز.
