Qazaqstannyń birinshi, álemniń 18-raketkasy Elena Rybakina Rim WTA týrnirin jeńispen bastady, dep habarlaidy "Ult aqparat".
Qazaqstandyq tennisshi bastapqy kezdesýin Reseidiń birinshi, álemniń 31-raketkasy Ekaterina Aleksandrovamen ótkizdi.
E.Rybakina biyl Qytaidaǵy Shenchjen týrniriniń finalynda jáne AQSh-taǵy Tsintsinnati jarysynyń alǵashqy ainalymynda E.Aleksandrovadan utylyp qalǵan edi.
Bul joly báseke basqasha órbip, E.Rybakina birinshi sette qarsylasyn tas-talqan etti – 6:0. Ekinshisinde de 6:4 esebimen meselin qaiyrdy.
Bar bolǵany 1 saǵat 1 minýtqa sozylǵan matchta osy dodanyń 10-raketkasy bolyp tirkelgen qazaqstandyq tennisshi 6 breik jasasa, reseilik sportshy bir ǵana breikpen jaýap qaiyrdy.
Osylaisha buǵan deiin E.Aleksandrovadan eki márte jeńilis tapqan E.Rybakina qarymta qaitara aldy. Ol úshinshi ainalymǵa shyǵý úshin álemniń 47-raketkasy, chehiialyq Mariia Boýzkova nemese reitingte 63-satydaǵy aýstraliialyq Aila Tomlianovichtiń bireýimen talasady.
Taǵy bir qazaqstandyq, álemniń 30-raketkasy Iýliia Pýtintseva alǵashqy ainalymda reitingte 49-oryndaǵy shvetsiialyq Rebekka Petersonmen sheberlik baiqasady.
Erler arasynda Mihail Kýkýshkin Rimde irikteý saiystarynyń finalynda germaniialyq Dominik Kiopferden 6:2, 4:6, 2:6 esebimen jeńilip, negizgi týrnirge óte almai qaldy.
Al álemniń 54-raketkasy Aleksandr Býblik alǵashqy ainalymda reitingte 38-oryndaǵy US Open týrniriniń 2014 jylǵy chempiony, horvatiialyq Marin Chilichpen kortqa shyǵady.
