Iaroslava Shvedova tennisten Qazaqstan áielder quramasyna basshylyq etetin boldy, dep habarlaidy "Ult aqparat".
Qazaqstan tennis federatsiiasy málim etkenindei, Ia.Shvedova bapkerlikpen qatar oiynshy retindegi jolyn da jalǵastyrady.
«Qazaqstan tennis federatsiiasynyń prezidenti Bolat Ótemuratovtan osyndai usynys túsýi – men úshin úlken qurmet. Kapitandyqpen qatar oiynshy bolý ońai emes. Jaýapkershilikti sezine otyryp, federatsiia basshylyǵy artqan senimdi aqtaý úshin bar kúshimdi salamyn», dedi Ia.Shvedova.
Egiz sábii dúniege kelýine bailanysty sportta úzilis alǵan Ia.Shvedova biylǵy jyl basynda kortqa qaita oraldy. 7-8 aqpanda Kortreikte ótken Federatsiia kýbogy irikteý kezeńinde Qazaqstan – Belgiia matchyna qatysyp úlgerdi.
Ia.Shvedovadan buryn Qazaqstan áielder quramasyna Dias Dosqaraev jetekshilik etti. Oqýǵa ketýine bailanysty D.Dosqaraev Qazaqstan tennis federatsiiasynyń vitse-prezidenti qyzmetinen de bosatyldy.
Ia.Shvedova – tennisten eńbek sińirgen sport sheberi, juptyq synda eki márte «Úlken dýlyǵa» (Ýimbldon, AQSh ashyq chempionaty – 2010) týrniriniń jeńimpazy, bes dúrkin finalisi, WTA jarystarynyń 15 márte chempiony, 2014 jylǵy Aziia oiyndarynyń qola júldegeri.
Iaroslava 2012 jyly álemdik reitingte Qazaqstan úshin rekordtyq 25-orynǵa kóterilgen bolatyn. Bul nátijeni biyl taǵy bir qazaqstandyq Elena Rybakina qaitalady. Qazirgi kezde Sankt-Peterbýrgte óner kórsetip jatqan E.Rybakinanyń óz kórsetkishin odan saiyn jaqsartatyndai múmkindigi bar.
Eske sala keteiik, budan buryn Aleksandr Býbliktiń Rotterdam týrniriniń shirek finalyna shyǵa almaǵanyn jazǵan bolatynbyz.
