Qazaqstannyń birinshi raketkasy Elena Rybakina álemdik reitingte 26-orynǵa kóterildi, – dep habarlaidy "Ult aqparat".
Ótken senbi kúni Aýstraliiadaǵy Hobart týrniriniń jeńispazy atanǵan E.Rybakina osylaisha reitingtegi óziniń jeke rekordyn jańartyp qana qoimai, qazaqstandyqtardyń úzdik kórsetkishine jaqyn qalyp tur. 2012 jyly Iaroslava Shvedova 25-orynǵa kóterilgen edi.
Búgin bastalǵan Aýstraliia ashyq chempionatynyń 29-raketkasy bolyp tirkelgen E.Rybakina alǵashqy matchyn reitingte 65-satydaǵy amerikalyq Bernarda Peramen ótkizedi. Osy «Úlken dýlyǵa» dodasynda sátti óner kórsetse, qazaqstandyq tennisshi reitingte odan saiyn joǵarylaityny anyq.
Taǵy bir qazaqstandyq Iýliia Pýtintseva reitingte 36-dan 38-ge tómendese, Zarina Diias 73-ornynda qaldy. Bul ekeýi Aýstraliia ashyq chempionatynda erteń oinaidy. Iu.Pýtintseva ózinen bir saty joǵary turǵan taibeilik Se Shýveimen, Z.Diias álemniń 24-raketkasy, amerikalyq Amanda Anisimovamen sheberlik baiqasady.
Erler arasynda jekelei synda Aleksandr Býblik pen Mihail Kýkýshkin kortqa búgin shyǵady. Ekeýiniń de qarsylastary – aýstraliialyqtar. A.Býblik Djordan Tompsonmen, M.Kýkýshkin Mark Polmanspen kúsh synasady.
Eske sala keteiik, budan buryn Andrei Golýbev pen Aleksandr Nedovesovtiń juptyq synda Bangkok týrniriniń jeńimpazy atanǵanyn jazǵan bolatynbyz.
