«Teńizshevroil» JShS bolashaq keńeitý jobasynan 8,9 myń qyzmetker jumystan bosatylady. Bul týraly Májilis depýtattarynyń saýalyna QR Premer-Ministri Álihan Smaiylovtyń jaýabynda aitylǵan, dep habarlaidy QazAqparat.
«Osy jyldyń 6 aiynda «Teńizshevroil» JShS bolashaq keńeitý jobasynan 7,6 myń qyzmetker jumystan bosatyldy. Onyń ishinde TShO ishinde – 1,1 myń adam, sondai-aq basqa da uqsas kásiporyndarǵa – 332 adam, bos jumys oryndaryna – 354 adam jumysqa ornalastyryldy. 645 adam jumysynan aiyrylý boiynsha járdemaqy alýda. 888 adam Halyqty jumyspen qamtý ortalyǵynda esepte tur jáne 4,3 myń burynǵy qyzmetkerlermen túsindirý jumystary júrgizilýde. Buǵan qosa, biyl shilde aiynan qyrkúiek aiyna deiin taǵy 8,9 myń qyzmetkerdi bosatý josparlanýda. Onyń ishinde TShO-ǵa 941 adamdy jumysqa ornalastyrý kózdelgen», - dedi Úkimet basshysy jaýabynda.
Onyń atap ótýinshe, Eńbek jáne halyqty áleýmettik qorǵaý ministrligi, TShO jáne Atyraý oblysy ákimdigi arasyndaǵy úsh jaqty kezdesý aiasynda TShO jobalarynan bosatylatyn qyzmetkerlerdi josparly bosatýǵa monitoring jáne jumyspen qamtamasyz etý jónindegi jol kartasy iske asyrylyp jatyr. Jol kartasyna sáikes jumystan bosatylatyn jumyskerlerdiń bir bóligi uqsas kásiporyndarǵa aýystyrylatyn bolady. Sondai-aq olarǵa kásiptik baǵdar berýdi júrgizýdi, kásipkerlikke yntalandyrýdy jáne memleket sýbsidiialaityn jumys oryndaryn uiymdastyrýdy, sondai-aq qysqa merzimdi oqytýdy qosa alǵanda, halyqty jumyspen qamtý ortalyǵy arqyly jumysqa ornalastyrý boiynsha járdem kórsetiledi.
«Alaida, joǵary bilikti qyzmetkerler qataryndaǵy jumystan bosatylǵan qyzmetkerlerdiń qalǵan bóligi olardy odan ári jumysqa ornalasýǵa kómek kórsetýdi qajet etpeidi. Qandai da bir salada úlken kásibi jumys tájiribesi, bilimi jáne biregei daǵdylary bar adamdar óz betinshe jumysqa ornalasady. Osyǵan bailanysty, jumystan bosatylatyn qyzmetkerlerdi jumysqa ornalastyrý maqsatynda Úkimet jan-jaqty kómek kórsetý jáne qamtý jáne halyq arasynda jumyssyzdyq deńgeiiniń ósýine jol bermeý jóninde barynsha sharalar qabyldaýda», - dedi Álihan Smaiylov resmi jaýabynda.
