2022 jyldyń birinshi toqsanynda "Teńizshevroil" kompaniiasy 7 myń adamdy jumystan shyǵarmaq. Mundai sheshim bolashaq keńeitý jobasynyń aiaqtalýymen bailanysty qabyldanǵan, dep jazady Sputnik Qazaqstan.
TShO Atyraý oblysynyń ákimdigimen, energetika men eńbek jáne halyqty áleýmettik qorǵaý ministrlikterimen birlese otyryp, jumysshylar qataryn qysqartady. Alaida TShO qysqartýǵa iligetin jumysshylardyń naqty sanyn ataǵan joq.
"Bolashaq keńeitý jobasyn iske asyrý barysynda TShO jergilikti bilikti kadrlardy daiyndap, halyqaralyq kompaniialarmen seriktestik arqyly tehnologiialardy úlestirip, óńir infraqurylymyn jańǵyrtýǵa atsalysty. Jobany iske asyrý barysynda TShO suranysqa ie mamandyq ielerin daiyndaý maqsatynda 19 myńnan astam adamdy oqytý men qaita oqytýdy qarjylandyrdy", - dep habarlady "Teńizshevroil" kompaniiasyndaǵylar "Aq Jaiyq" basylymyna.
Esterińizge sala keteiik, buǵan deiin BAQ-ta 39 myń jumysshynyń qysqartylatyny jaily aqparat tarady. 2022 jyldyń birinshi toqsanynda 7 myń adam qysqartylmaq.
"Bul tek boljam ǵana. Máselen, biyl josparlanǵan 15 myńnyń tek 2 myńy ǵana qysqartyldy", - deidi jumyspen qamtýdy úilestirý jáne áleýmettik baǵdarlamalar basqarmasy basshysynyń orynbasary Erkebulan Ábilqasymov.
Onyń aitýynsha, memlekettik baǵdarlamalar aiasynda 12 myńǵa jýyq adamdy jumyspen qamtý josparlanǵan.
"Munai-himiia kesheni salasynda da investitsiialyq jobalar bar. Qurylys kezinde 20 myńǵa jýyq adamdy jumyspen qamtamasyz etýdi josparlap otyrmyz", - dedi ol.
Energetika ministrligi ne deidi?
Qazaqstannyń energetika ministrliginde jaqynda ǵana "Teńizshevroil" kompaniiasynyń ókilderimen kezdesý ótti. Otyrysta Teńiz ken ornyn bolashaqta keńeitý jobasyn iske asyrý máselesi talqylandy.
Vedomstvonyń málimetinshe, bolashaqta keńeitý jobasyn júzege asyrý munai óndirý kólemin jylyna 12 million tonnaǵa deiin arttyrýǵa múmkindik beredi.
Energetika ministri Maǵzum Myrzaǵaliev jobany iske asyrý barysynda jumysshylardyń bosatylýyna bailanysty turaqty monitoring qajet ekenine nazar aýdardy. Ministrlik qyzmetkerlerdi daiarlaý men qaita daiarlaýdy qarastyra otyryp, olarǵa TShO-nyń basqa obektilerinen jumys berý múmkindigin qarastyrýdy usyndy.
Bolashaq keńeitý jobasynyń quny 45,2 milliard dollardy quraidy. Jobanyń aiaqtalýy 2023 jylǵa josparlanyp otyr. Boljam boiynsha jobadaǵy qazaqstandyq qamtý 36%-dy quraidy.
Teńiz – Atyraý oblysynda ornalasqan iri munai ken orny. Ol Qazaqstandaǵy munai qory boiynsha (Qashaǵan ken ornynan keiin) ekinshi orynda tur. Ken ornynan óndiriletin munai kólemi 750 millionnan 1 milliard 125 million tonnaǵa deiin baǵalanady. Geologiialyq qordyń boljamdy kólemi - 3 milliard tonna. Ilespe gazdyń qory - 1,8 trillion tekshe metr.
