Aqtóbege Atyraýdan bir top jumysshy keldi. Olardan analiz alyndy. Indet anyqtalmasa, eki kúnnen soń bári úiine jiberiledi, dep habarlaidy "Ult aqparat"
«Búgin Atyraýdan bir top jumysshy keldi. Barlyǵy 432 turǵyn. Olar qabyldandy, karantindik gospitalge jatqyzyldy. Laboratoriialyq tekserýge qajetti analiz alyndy. Zertteý nátijesine bailanysty sheshim qabyldanady. Eger eshkimnen indet anyqtalmasa, úidegi karantinge jiberiledi. Eger anyqtalsa, ár adamǵa jeke sheshim qabyldanady. Qazir eshqaisysynda dene qyzýy joq», - dedi oblystyq densaýlyq saqtaý basqarmasynyń basshysy Áset Qaliev.
Aita keteiik, vahtalyq ádispen jumys istep júrgen adamdardyń arasynda aýdan turǵyndary da bar. Barlyǵy 1847 adam kezeń-kezeńimen 1 mamyrǵa deiin kelip bolady. Al búgin jetkizilgenin politsiia men dárigerler temirjol vokzalynan arnaiy kútip alyp, karantindik gospitalderge ornalastyrdy. Poiyz jol boiy Qandyaǵash stansasyna toqtap, sol jerden dárigerler mindi.
