Atyraý oblysyndaǵy Teńiz kenishinde 90-nan astam qyzmetker koronavirýsqa qarsy vaktsina alǵan. Endi taǵy da 210 adam vaktsina saldyrady, dep habarlaidy "Ult aqparat".
Oblystyq densaýlyq saqtaý basqarmasy baspasóz qyzmetiniń málimetinshe, ken ornyndaǵy meditsina qyzmetkerleriniń densaýlyǵyn qorǵaý úshin taǵy da 210 Gam-COVID-Vac (Sputnik V) vaktsinasyn jetkizip berilgen.
«Qazir «Teńizshevroildyń» 90-nan astam qyzmetkeri vaktsina aldy. Kompaniia Gam-COVID-Vac (Sputnik V) vaktsinasyn kompaniia men merdiger mekemelerdiń barlyq qyzmetkeri úshin satyp alý múmkindigin qarastyryp otyr. Osyǵan orai «Teńizshevroil» COVID-19 infektsiiasynyń odan ári taralaýyna jol bermeý maqsatynda erikti vaktsinalaý baǵdarlamasy úshin vaktsinalardy satyp alýǵa qatysty Qazaqstan Úkimeti tarapynan qoldaý kútedi» -dep habarlady basqarmanyń baspasóz qyzmetinen.
«Teńizshevroil» klinikasynyń meditsinalyq direktory Abdýlla Iýsýpbekovtiń aitýynsha, vaktsinalaýdyń negizgi maqsaty – Teńizdegi jumysshylar arasynda ujymdyq immýnitetti qalyptastyrý.
«Vaktsinalaý – COVID-19 infektsiiasynan qorǵanýdyń mańyzdy quraly, kompaniia qyzmetin qaýipsiz jalǵastyrýdyń kepili. El ekonomikasynyń damýyna eleýli úlesin qosatyn kompaniia jumysyn sanitarlyq-epidemiologiialyq talaptarǵa sai júzege asyryp otyr. Memlekettik organdardyń usynystaryn qoldanýda. Kompaniia úshin óndiristik jumysty úzdiksiz jalǵastyrý, Keleshek keńeiý jobasynyń-Uńǵy erneýindegi qysymdy basqarý jobasynyń (KKJ-UEQBJ) alǵa basýyn qamtamasyz etý óte mańyzdy» -deidi Abdýlla Iýsýpbekov.
Ken ornynda koronavirýsqa qarsy vaktsina alǵandardyń biri – kompaniianyń órt jáne apatty joiý qyzmetiniń meditsinalyq úilestirýshisi Rýslan Jalǵazin.
«Men únemi meditsina jańalyqtarynan habardar otyramyn. Jalpy vaktsinalar, sonyń ishinde «Sputnik V» vaktsinasynyń klinikalyq zertteýler kórsetkendei, janama áseri joǵyn bildim. Vaktsinasyz qaýipti virýstyń taralýyn tejeý qiyn bolar edi. Sondyqtan, atalǵan vaktsinanyń eki komponentin aldym. Qazir ózimdi jaqsy sezinýdemin» deidi ol.
