30 qyrkúiekte Qazaqstannyń depozitterge kepildik berý qory (QDKQ) «Eýraziialyq bank» AQ arqyly «Tengri Bank» AQ salymshylaryna kepildik berilgen ótemdi tóleýdi bastady, dep habarlaidy "Ult aqparat".
Saǵat 17:00-degi jaǵdai boiynsha, agent-bank Qazaqstannyń depozitterge kepildik berý qory esebinen azamattarǵa shamamen 4,8 mlrd teńge aqshasyn qaitardy. Bul «Tengri Bank»AQ salymshylarynyń aldynda kepildik berilgen ótem somasy boiynsha mindettemelerdiń jalpy kóleminiń 27% quraidy.
QDKQ-dan málim etkendei, kepildik berilgen ótemdi tóleý rekordtyq qysqa merzimde – «Tengri Bank» AQ barlyq bank operatsiialaryn júrgizýge arnalǵan litsenziiasynan aiyrylǵan kúnnen bastap 8 jumys kúninen keiin bastaldy.
«Salystyrý úshin aldyńǵy bankter boiynsha tólemniń bastalý merzimi olardy qarjy retteýshisi litsenziiasynan aiyrǵannan keiin 80-nen 107 jumys kúnine deiin boldy.
Salymshylarǵa qarajatty jedel tóleý 2020 jylǵy 1 qańtardan bastap qoldanysqa engizilgen jáne 2019 jyly Qordyń usynysy boiynsha Qazaqstan Ulttyq bankimen birlesip jasaǵan zańnamalyq ózgeristerdiń arqasynda múmkin boldy. Osy ózgeristerge sáikes Qor sot sheshimin kútpei-aq, ózine kepildik berilgen ótemdi tóleý boiynsha mindettemelerdi qabyldaidy», - dedi QDKQ-dan.
«Tengri Bank» AQ salymshylary óz aqshasyn qaitaryp alý úshin «Eýraziialyq bank» AQ-nyń kez kelgen filialy nemese bólimshesine baryp, ótinish toltyrýlary qajet. Salymshylar óteý somasyn «Eýraziialyq bank» AQ saitynda onlain teksere alady.
Eske salaiyq, 2020 jyldyń 18 qyrkúieginde QR Qarjy naryǵyn retteý jáne damytý agenttigi «Tengri Bank» AQ-ny barlyq bank operatsiialaryn júrgizý litsenziiasynan aiyrý týraly sheshim qabyldaǵan bolatyn.
