Temirtaýda 59 jastaǵy er adam COVID-19-dan kóz jumdy. Bir kúnnen keiin málimetter bazasynda ol koronavirýstyq infektsiiaǵa qarsy vaktsinanyń ekinshi komponentin alǵany týraly belgi paida boldy. Qazirgi ýaqytta tártip saqshylary qaladaǵy densaýlyq saqtaý mekemeleriniń biriniń dárigerlerin vaktsinatsiia pasportyn qoldan jasady degen kúdik boiynsha tekserip jatyr, dep habarlaidy QazAqparat.
Qaraǵandy oblysynyń politsiia departamenti QR QK 385-baby «Resmi qujattardy qoldan jasaý jáne ótkizý» boiynsha qozǵalǵan qylmystyq isti tirkep, tergeýdi bastady.
Atalǵan faktini Qaraǵandy oblysynyń Meditsinalyq jáne farmatsevtikalyq baqylaý komitetiniń departamenti COVID-19-ǵa qarsy vaktsinatsiialanǵandardyń arasynda koronavirýstyq infektsiiadan bolatyn ólim-jitimge qatysty monitoring júrgizý barysynda anyqtady.
«Aita keterligi, Temirtaý qalasynyń 59 jastaǵy turǵyny juqpaly aýrýlar gospitaline jatqyzylǵanǵa deiin vaktsinanyń birinshi komponentimen ekpe aldy degen málimet bolǵan. Bes kúnnen keiin bul azamat indetten kóz jumdy. Alaida, ol qaitys bolǵannan keiingi kúni bazada er adamnyń vaktsinanyń ekinshi komponentin alǵany týraly belgi paida boldy. Bul, árine, onyń alǵashqy vaktsinany alýyna qatysty mamandardyń kúmánin týdyrdy», - dep túsindirdi politsiia departamentiniń tergeý bóliminiń bastyǵy Almaz Salamatov.
Quqyq buzýshylyq rastalǵan jaǵdaida kinálilerge 2000 AEK-ke deiingi mólsherde aiyppul tóleýge týra keledi nemese olar eki jylǵa bas bostandyǵynan aiyrylýy múmkin. Qazirgi ýaqytta atalǵan fakti boiynsha tergeý júrgizilýde. Tiisti instantsiialarǵa suranystar joldandy. Tergeý barysy Oblystyń PD basshylyǵynyń baqylaýyna alyndy.
