Májilis depýtaty Azat Perýashev Úkimet basshysy Asqar Maminniń atyna joldaǵan saýalynda kásipkerlerge qatysty «monitoringtik toptardyń» qyzmeti boiynsha máseleni kóterdi, dep habarlaidy "Ult aqparat".
«Ótken jyldyń 18 qarashasy men 2 jeltoqsanyndaǵy saýaldarda biz olardyń reidterin zańǵa sáikes kelmeidi dep sanap, shaǵyn jáne orta biznestiń zańdy quqyqtaryn qorǵaýyn talap ettik. Sonymen qatar, epidemiologiialyq baqylaý tek tolyq qamtylǵan kezde ǵana tiimdi. Al jeke nysandardy (tek ózderi biletin sebepter boiynsha) ainalyp ótý arqyly bul toptar keide pandemiiaǵa, indettiń taralýyna tosqaýyl qoiýdyń ornyna, kóbine esep berý jáne bopsalaýmen ainalysady. Máselen, «Aq jolǵa» kómekke júgingen temirtaýlyq kásipker shaǵyn dúkeniniń bir aida 18 ret «monitorshylardyń» tekserýinen ótkenin habarlady! Mundai mysaldar az emes. Mundai árekettermen monitoring toptary pandemiiadan aman qalǵan kásipkerlerge ǵana emes, qoǵamdaǵy tynyshtyqqa qaýip tóndiredi dep sanaimyz», - dedi Perýashev.
Onyń paiymynsha, elimizdegi shaǵyn jáne orta biznes kúrdeli jaǵdaiǵa tap bolyp otyr.
«Aq jol» fraktsiiasy Almaty oblysynyń Tekeli qalasynda bolǵan oqiǵalarǵa bailanysty osy taqyrypqa qaita oralýǵa májbúr. Onda bazarda kókónis satatyn tórt kishkentai búldirshinniń anasy, kásipker Dina Qashqanovany politsiia men ákimdikten kelgen praktikanttardan turatyn top tómen túsirilgen maskamen sýretke túsirip alǵan. Iaǵni onyń betinde maska bolǵan, biraq kásipkerdiń murnyn jappaǵan. Osynyń negizinde áielge 670 myń teńge aiyppul salyndy, alaida onyń kúndelikti kirisi 5 myń teńgeni quraidy. Aiyppuldy tóleý úshin adam alty ai jumys isteýi kerek, sonda osy ýaqyt ishinde onyń tamaq ishpeýi, páter aqysyn tólemeýi, balalardy tamaqtandyrmaýy jáne kiinbeýi kerek», - dedi depýtat.
Osy oraida A. Perýashev myna usynystardy jariialady:
- monitoringtik toptardy quqyqtyq retteý týraly 2020 jylǵy 2 jeltoqsandaǵy bizdiń saýalymyzda qoiylǵan usynystarǵa qaita oralý jáne jalpy alǵanda olardyń orynsyzdyǵy týraly máseleni qaita qaraý;
- jeke tulǵalardyń kez kelgen ákimshilik aiyppuldaryn azamattardyń jeke tabystaryna bailanystyrýdy engizý, mundai aiyppuldyń somasy naqty adamnyń ailyq jalaqysynyń nemese naqty jeke kásipkerdiń paidasynyń 2-3%-ynan, eń kóbi 5%-ynan aspaýǵa tiis.
