Elimizde jolaýshylar poiyzyna arnalǵan bilet baǵasy qymbattamaidy. Bul týraly búgin «Qazaqstan Temir joly» UK» AQ basqarma tóraǵasy Nurlan Saýranbaev málim etti, dep habarlaidy QazAqparat.
«Bilet baǵasy qymbattamaidy. Negizinen eksporttyq júkke baǵa kóteriledi. Ózderińizge de belgili, jolaýshylar tasymaly – memlekettiń áleýmettik qyzmeti. Jyl saiyn memleket shamamen 30 mln teńge sýbsidiia beredi. Munyń ústine, «Qazaqstan temir joly» azamattarymyz arzan bilet satyp alyp, sapar jasaý úshin óz qarajaty esebinen qosymsha 90 mlrd teńge sýbsidiialaidy», - dedi Nurlan Saýranbaev.
Aita keteiik, ótken jyldyń naýryzynan bastap elimizde temirjol biletteri qymbattaǵan bolatyn.
«Áleýmettik mańyzy bar qatynastar boiynsha jolaýshylar tasymalyn júzege asyrýmen bailanysty tasymaldaýshynyń shyǵystaryn uzaq merzimdi sýbsidiialaýǵa arnalǵan sharttarǵa sáikes, 2021 jyldyń 1 naýryzynan bastap oblysaralyq jáne qala mańyndaǵy qatynastardaǵy barlyq áleýmettik mańyzy bar baǵyttarǵa temirjol biletteriniń quny 7 paiyzǵa artady», - dep habarlaǵan edi «Jolaýshylar tasymaly» AQ.
