Shyǵys Qazaqstan oblysynda temir kenin zańsyz óndirip, satýmen ainalysqan kásipkerge qatysty sot úkimi shyqty. Qylmystyq istiń saldarynan tabiǵi aýmaqqa da eleýli zalal kelgen, dep habarlaidy ult.kz.
Qarjylyq monitoring agenttiginiń málimetinshe, tergeý barysynda «AK Metal» JShS-niń litsenziiasy tek qatty paidaly qazbalardy barlaýǵa berilgeni anyqtalǵan. Alaida kompaniia zerthanalyq jáne tehnologiialyq zertteýler júrgizý degen jeleýmen temir kenin jáne onyń kontsentratyn is júzinde ónerkásiptik kólemde óndirip otyrǵan. Ónim keiin Qazaqstan aýmaǵynda jáne shetelde satylǵan.
Tergeý málimetinshe, zańsyz óndiris nátijesinde 70 myń tonnadan astam temir keni satylǵan. Al qylmystyq jolmen alynǵan tabys kólemi 1 milliard teńgeden asqan.
Ken óndirý jumystary qorshaǵan ortaǵa da áser etken. Sonyń saldarynan topyraq jamylǵysy búlinip, tabiǵi relef pen landshaft ózgergen. Aýmaqta taý-ken qazbalary men úiindiler paida bolǵan.
QMA málimetinshe, sottalǵan azamat zańsyz jolmen tapqan qarajatyna qymbat múlik satyp alǵan. Onyń ishinde Land Rover avtokóligi, bes bólmeli páter, úsh kommertsiialyq nysan, eki avtoturaq orny jáne Almaty qalasy men oblysyndaǵy eki jer ýchaskesi bar.
Sot bul múlikterdiń jalpy quny 1 milliard teńgeden asatynyn eskerip, barlyǵyn memleket paidasyna tárkileý týraly sheshim shyǵardy.
«AK Metal» JShS basshysy D. K. Bektemirov bir jylǵa bas bostandyǵynan aiyryldy.
Úkim ázirge zańdy kúshine engen joq.
