Foto: EK
Búgin Májilis otyrysynda depýtat Ashat Aimaǵambetov azamattar mindetti áleýmettik saqtandyrý boiynsha nege ailap kezek kútetininiń sebebin aitty, dep habarlaidy Azattyq Ruhy.
Dálirek aitsaq, Premer-ministr Álihan Smaiylovtyń atyna joldaǵan depýtattyq saýalynda ol MÁMS júiesi arqyly qaralǵysy keletin qarapaiym halyq birneshe ai kezek kútýge májbúr ekenin jáne bul qoldan jasalyp otyrǵan problema ekenin alǵa tartty.
«Qazir azamattar aýrýhana baryp, tekseristen tegin ótemin dese, onda bir ai nemese úsh ai kútý kerek. Al eger sol adamdar sol tekseristen aqyly ótemin dese, dál sol ýaqytta nemese úsh minýtta ótýine bolady. Sondyqtan eriksizden aqyly qyzmetti alýǵa májbúr bolady. Onda biz ne úshin ai saiyn ózimizdiń jalaqymyzdan tóleimiz deidi. Bul - negizinen jasandy problema. Óitkeni, engizilgen qarjylandyrý júiesine de bailanysty bolyp tur», - deidi Aimaǵambetov.
Depýtat bul máseleni sheshý úshin MÁMS júiesi arqyly usynylatyn qyzmetterdiń aqysy fakt boiynsha bólinýi kerek deidi.
«Qazir emhanalar is júzinde ai saiyn kvota arqyly qarajat alady. Mysaly, bir aiǵa KT jasaýǵa on kvota, MRT jasaýǵa bes kvota beriledi. Al, eger naýqastar sany budan kóp bolsa, onda dáriger naýqasty kelesi aiǵa jazýǵa májbúr. Osyny eskersek, ai saiynǵy qarjylandyrýdan bas tartý kerek. Kórsetilgen qyzmetterdiń aqysy fakt boiynsha tólenýi kerek. Naýqastarǵa meditsinalyq uiymdy tańdaýda erkindik berip, túsinispeýshilik bolmaý úshin tegin meditsinalyq kómektiń kepildendirilgen kólemi men med saqtandyrý paketin naqtylaýdy usynamyn», - dedi ol.
Depýtat sonymen qatar qazir dárigerlerdiń kóbi naýqastyń qaraýdyń ornyna kompiýter «shuqylap» otyrýǵa májbúr ekenin aityp, Úkimet basshysyna bul problemany sheshýdiń de jolyn usyndy.
«Ekinshi, aqparattyq júieler arasyndaǵy alshaqtyq pen dárigerlerdiń artyq júktemesi boiynsha. Búgingi tańda dárigerler naýqastardy tekserýdiń ornyna, kompiýterlerge telmirip, derekterdi túrli aqparattyq júiege engizýge májbúr bolǵandyqtan, naýqastardy qaraýǵa ýaqyttary da joq. Bir naýqasty tekserýge beriletin standartty ýaqyt kompiýter toltyrýǵa ketip otyr. Sondyqtan barlyq qujattamany toltyrýdy medbikelerge tapsyryp, shtat sanyn arttyrý arqyly dárigerlerdiń júktemesin azaitý kerek jáne biryńǵai aqparattyq júieni iske qosý boiynsha júrip jatqan jumysty shuǵyl aiaqtaý kerek», - dedi meditsinalyq qyzmetterdiń sapasyna qatysty Premer-ministrge depsaýal joldaǵan Aimaǵambetov.
