Tájikstan Qyrǵyzstanmen shekarada ustalǵan qyrǵyz oqýshylaryn kelissózderden soń bosatty. Bul týraly Qyrǵyzstan UQMK Shekara qyzmeti habarlady.
Oqiǵa 23 qyrkúiekte Leilek aýdanynda bolǵan. Jashtyk aýlynyń 16 jastaǵy eki turǵyny ustalǵan. Qyrǵyzstan shekara qyzmetiniń málimeti boiynsha, bul ekeýi shekaradaǵy shartty syzyqqa jaqyn mańda kontrabandashylarǵa júk tasýǵa kómektesken.
Shekaralas Batken jáne Soǵdy oblysytary shekarashylarynyń basshylary "Kýlýndý" beketinde kezdesti. Sonyń nátijesinde tájik tarapy ustalǵan eki oqýshyny qyrǵyz shekarashylaryna berdi.
23 qyrkúiekte Qyrǵyzstan men Tájikstan shekarasyna jaqyn mańda eki eldiń oqýshylary janjaldasyp, sonyń saldarynan tórt qyrǵyz oqýshysy zardap shekken. Tájik tarapy eki oqýshy jaralanǵanyn habarlady. Osy oqiǵadan soń Batken aýdanynyń ákimi Tájikstannyń Isfara aýdanynyń basshysymen kezdesken. Taraptar jergilikti turǵyndar arasynda túsindirý jumystaryn júrgizýge, zań buzǵandarǵa shara qoldanýǵa kelisken.
Qyrǵyz-tájik shekarasy 970 shaqyrymǵa sozylyp jatyr, qazir sonyń 519 shaqyrymynyń ǵana mártebesi anyqtalǵan.
