Tájikstan prezidenti Emomali Rahmonnyń úsh nemere inisi dárigerler men sheneýnikterdi uryp-soqqan. Arasynda densaýlyq saqtaý ministri de bar. Bul jóninde Azattyq habarlady.
Oqiǵa 20 shildede bolǵan, sol kúni tájik prezidentiniń týǵan qaryndasy Kýrbonbi Rahmonova COVID-19 virýsynan kóz jumǵan.
Soqqydan densaýlyq saqtaý jáne halyqty áleýmettik qorǵaý ministri Jamoliddin Abdýllozoda men memleket basshysy apparaty janyndaǵy meditsinalyq ortalyq jetekshisi Holmahmad Rahimzoda zardap shekken.
Bilik densaýlyq saqtaý ministriniń soqqyǵa jyǵylǵany jóninde pikir bildirmedi.
Tájikstan prezidentiniń týǵan qaryndasy, 64 jastaǵy Kýrbonbi Rahmonova 20 shildede aýrýhanada kóz jumǵan. Ony emdeýge Germaniia, Resei jáne Ózbekstannan bilikti mamandar shaqyrylǵan.
Ol kóz jumardan eki saǵat qalǵanda, sheteldik dárigerler emdeý tásili durys emes ekenin aitqan. "Bul onyń balalary Fahriddin, Farrýh jáne Ziiodali Safarovtardyń ashý-yzasyn týǵyzdy. Birden sheneýnikterdi bas salyp, urdy. Olardy prezidenttiń úlken uly Rýstam Emomali sabyrǵa shaqyrǵan" deidi derekkóz.
Densaýlyq saqtaý ministri bárinen qatty soqqy alǵan. Iyǵynan jaraqat alǵan.
Densaýlyq saqtaý ministri AQSh-tyń Tájikstanǵa 1,5 million dana Moderna vaktsinasyn berý sharasyna qatyspady.
Prezidenttiń qaryndasyn 21 shildede jerlegen. Onyń ólimi jóninde resmi habarlanbady.
