Ǵaryshtan monitoringileý týraly buiryqty jańa jylǵa deiin shyǵarýǵa atsalysý kerek.
Mundai usynysty búgin Ulttyq qoǵamdyq senim keńesiniń ekinshi otyrysynda atalǵan keńes múshesi Muhtar Taijan kóterdi, dep habarlaidy "Ult aqparat".
«Búgingi kúnge deiin sheshimin taba almai kele jatqan eki máselege toqtalǵym keledi. Birinshiden, bárimizge málim jerge moratoriidiń aiaqtalatynyna eki jyl qaldy. Odan buryn biz aldyn ala sheshim qabyldaýymyz kerek. Sony eskere otyryp, jer qatynastarynyń ashyqtyǵy aýadai qajet. Ol úshin bizge ǵaryshtan monitoringileý týraly buiryq kerek bolǵan. Muny 3 ai buryn osynda aitqan edim. Ókinishke qarai, osy 3 aidyń ishinde bul buiryq áli jaryqqa shyqqan joq. Bizde keibir zańdar óte kúrdeli, mysaly biýdjet nemese salyq týraly zańdar eki aidyń ishinde Májiliske kirip, talqylanyp, qabyldanady. Al kishigirim buiryq búgingi kúnge deiin Jer komitetinen shyqqan joq. Menińshe, Jańa jylǵa deiin sol buiryqtyń shyǵýyna atsalysýymyz kerek», - Muhtar Taijan.
Onyń atap ótýinshe, sheshimin tappaǵan ekinshi másele bar, bul jeke tulǵalardyń bankrottyǵy týraly zań. Bul rette sarapshy sheteldik elderdiń tájiribesin alǵa tarta otyryp, bundai zańnyń qajettigin de atap ótti.
