2021 jyldyń 4 aiynda áýe kóligimen 2,5 mln jolaýshy tasymaldandy. Bul týraly halyqqa esep berý kezdesýinde QR Indýstriia jáne infraqurylymdyq damý ministri Beibit Atamqulov aitty, dep habarlaidy QazAqparat.
«Azamattyq aviatsiia pandemiiaǵa bailanysty eń kóp zardap shekken salalardyń biri boldy. 2020 jyly tótenshe jaǵdai kezinde ishki jáne halyqaralyq reister toqtatyldy. Bul tasymaldaý kólemine áser etti. Osy jyldyń basynan bastap ushýdy birtindep qalpyna keltirgennen keiin negizgi kórsetkishterdiń ósýi baiqalady. 2021 jyldyń 4 aiynda tasymaldanǵan jolaýshylar sany 47 paiyzǵa artty. 2,5 mln jolaýshy tasymaldandy. Áýejailarda qyzmet kórsetilgen jolaýshylar sany 39 paiyzǵa ósti», - dedi ministr.
Onyń atap ótýinshe, búginde ishki reister tolyǵymen qalpyna keldi.
Sondai-aq, 14 elmen aptasyna 123 reis jiiligimen 43 marshrýt boiynsha halyqaralyq reister jańartyldy.
«Epidemiologiialyq ahýaldy eskere otyryp, áýe qatynasyn odan ári qalpyna keltirý jóninde dáiekti sharalar qabyldanyp jatyr. Jazǵy jáne eńbek demalysy kezinde azamattarymyzy bul jait alańdatyp otyrǵanyn bilemin. Bul baǵytta ministrlik jumys istep jatyr. Taiaý ýaqytta vedomstvoaralyq komissiia sheshiminen keiin jańa baǵyttar nemese azamattardyń jii qoldanatyn, biraq qazir jabyq turǵan baǵyttardyń ashylǵanyn estisizder. Qazirgi ýaqytta tiisti jumysty kórshiles memleketterdiń ministrlikteri deńgeiinde sheship jatyrmyz», - dedi Beibit Atamqulov.
