Ázerbaijan áskerileri Taýly Qarabaqtaǵy qaqtyǵysty toqtatý týraly kelisim aiasynda Armeniia qaitarǵan úsh aýdannyń ekinshisine kirdi. Ázerbaijan qorǵanys ministri 25 qarashada áskerilerdiń Kelbadjar aýdany aýmaǵyna engenin habarlady.
Bastapqyda Kelbadjar aýdany ázerbaijan jaǵyna 15 qarashaǵa deiin qaitarylýy tiis bolǵan. Biraq Ázerbaijan gýmanitarlyq sebeptermen aýmaqty “qaitarý merzimin” uzartqan.
Qorǵanys ministriniń aitýynsha, áskeri bólimsheler erkin jylji alýy úshin joldar qalpyna keltirilip, minalardan tazartylǵan.
Armeniia eki apta buryn Baký, Erevan, Máskeý qol qoiǵan kelisimge sáikes, Taýly Qarabaq mańyndaǵy úsh aimaq: Agdam, Kelbadjar jáne Lachin aýdandaryn ázerbaijan jaǵyna qaitarýǵa kelisken. Agdam 20 qarashada qaitaryldy. Lachin aýdany 1 jeltoqsanǵa deiin berilýi tiis.
Kremldiń habarlaýynsha, 24 qarashada Resei prezidenti Vladimir Pýtin, Ázerbaijan basshysy Ilham Áliev jáne Armeniia premer-ministri Nikol Pashinian telefonmen sóilesip, Máskeýdiń aralasýymen jasalǵan atysty toqtatý týraly kelisimniń oryndalý barysyn talqylaǵan. Kreml taratqan habarlamada taraptardyń sonymen birge gýmanitarlyq kómek jáne ekonomikalyq máselelerdi de qozǵaǵany jazylǵan.
- Ázerbaijannyń Taýly Qarabaq jáne oǵan japsarlas aimaqtary 1990 jyldardyń basynan beri etnikalyq armiandardyń baqylaýynda bolǵan. Qyrkúiekte Ázerbaijan bul aimaqty qaitarý úshin áskeri operatsiia bastady. Ázerbaijan áskeri moiyndalmaǵan Taýly Qarabaq respýblikasynyń biraz bóligin, sonyń ishinde Shýsha qalasyn jáne onyń mańaiyndaǵy aýdandardy baqylaýyna aldy. Atys kezinde eki jaqtan myńdaǵan adam qaza boldy. Olardyń arasynda áskeriler de, beibit turǵyndar da bar.
