Táýelsizdigimizdiń 30 jyly ishinde 1 million qandasymyz atamekenine oraldy. Bul týraly Qazaqstan halqy Assambleiasynyń HIH sessiiasynda Astana» telearnasynyń Qostanai oblysyndaǵy tilshisi Sanai Zańǵar aitty, dep habarlaidy QazAqparat.
«Azattyqtyń arqasynda Altaidan – Atyraýǵa deiingi baitaq dalanyń shekarasy belgilenip, qazyǵy qaǵyldy. San ǵasyrdyń túitkili bolǵan Qytai men Qazaqstan, Resei, Ózbekstan, Qyrǵyzstan, Túrkimenstan syndy memleketter arasyndaǵy shekara máselesi sheshilgende, álemdik qaýymdastyq tańdanysyn jasyra almady. Rasynda, keibir memleketter ǵasyrlar boiy shekara máselesin sheshe almai keledi. Al Siz, saiyn dalanyń shetki shebin sanaýly ýaqytta shegendep berdińiz. Eren eńbegińizge kemeldi keleshek urpaq óziniń tarihi baǵasyn beredi dep bilem», - dedi ol Elbasyna qarata.
Sonymen qatar ol QR Tuńǵysh Prezidenti negizin qalaǵan «Nurly kósh» baǵdarlamasymen eldiktiń eleýli 30 jylynda bir millionnan astam adam atamekenine oralǵanan aitty.
«Álbette ár qandas «Elim maǵan ne beredi dep emes, men elime ne berem degen» kemel oimen keldi. Onyń dáleli Tobyl óńirine turaqtaǵan bizdiń áýlet. Ata-anammen baýyrlarym ata kásippen ainalysyp, jaǵdaiyn jaqsartyp, tirshiligin túzep otyr», - dedi ol.
Sonymen qatar ol atamekenge at basyn tiregen aǵaiyn eldiń áleýmettik-ekonomikalyq áleýetin arttyrý jolynda aianbai eńbek etip jatqanyn, órkeniet kóshine ilesken óreli eldiń turmys-tirshiligine beiimdelip, túrli ulys ókilderimen til tabysyp, bite qainasqanyn atap ótti.
«Sońǵy jyldary qandas talapkerlerge bólinetin kvota eselep ulǵaidy. Sonyń arqasynda 7 myńnan astam qandas baýyr qazir elimizde bilim alyp júr. Tipti AQSh, Kanadada turatyn qazaq jastary áigili Garvard, Kembridj emes, Ortalyq Aziiadaǵy ozyq oqý oryny — Nazarbaev ýniversitetine túsip jatyr», - dedi ol.
