Táýelsizdik jyldarynda Qazaqstannyń syrtqy saýda ainalymynyń kólemi 100 mlrd dollarǵa jetti.
Bul týraly QR Premer-Ministriniń orynbasary Eraly Toǵjanov Táýelsizdiktiń 30 jyldyǵyna arnalǵan ǵylymi-praktikalyq konferentsiiada málim etti, dep habarlaidy QazAqparat.
«Elimizge 400 mlrd dollar shetel investitsiiasy tartyldy. Moiyndaý kerek, bul jetistiktiń negizinde, birinshi kezekte, Memleket basshylyǵynyń turaqtylyqtyń kepili retindegi tulǵasyna degen joǵary senim jatyr», -dedi Úkimet basshysynyń orynbasary.
Onyń paiymynsha, Qazaqstannyń TMD elderiniń ishinde tartylǵan investitsiianyń boiynsha jetekshi orynda turýy – zańdylyq.
«2002 jyly Qazaqstan burynǵy keńestik respýblikalardyń ishinde birinshi bolyp jetekshi halyqaralyq reiting agenttikteri tarapynan investitsiialyq tartymdy el dep tanyldy. Biyl búkil reiting agenttikteri investitsiialyq reiting boiynsha bergen baǵalaryn rastady. Tipti kóptegen kórsetkishterdi Qazaqstan Úkimetiniń róli men jalpy el ekonomikasynyń turaqtylyǵyn, sondai-aq, qarjylyq salanyń ornyqtylyǵyn atai otyryp kóterdi. Bul Ult kóshbasshysy nusqaǵan «100 naqty qadam» aiasyndaǵy institýtsionaldyq reformalardy tiimdi engizýdiń arqasynda boldy», - degen Eraly Toǵjanov Astana halyqaralyq qarjy ortalyǵynyń búginge róline toqtaldy.
«2018 jyly Astana halyqaralyq qarjy ortalyǵy quryldy. Ol qazir shetel investitsiianyń tartý men halyqaralyq deńgeide qarjylyq qyzmet kórsetýdiń habyna ainaldy. Búgin Qazaqstannyń syrtqy saýda ainalymynyń kólemi 100 mlrd dollar bolyp otyr. Bul eldiń halyqaralyq rezervin ulǵaitty», - dedi vitse-premer.
