Qazaqstannyń táýelsizdigi jolynda qýǵynda bolǵan azamattardyń eńbegi men erlikterin máńgi este qaldyrý jónindegi arnaiy joba ázirlenedi. Bul jaiynda Májilis depýtattarynyń saýalyna QR Premer-Ministriniń orynbasary Eraly Toǵjanovtyń jaýabynda aitylǵan, dep habarlaidy "Ult aqparat".
«QR Prezidentiniń Jarlyǵymen, Memlekettik hatshynyń tóraǵalyǵymen Saiasi qýǵyn-súrgin qurbandaryn tolyq aqtaý jónindegi memlekettik komissiia quryldy. Onyń quramyna qoǵamdyq uiymdardyń ókilderi men elimizdiń ǵalymdary, Prezident Ákimshiligi men Úkimet ókilderi, depýtattary, múddeli memlekettik organdardyń basshylary, kirdi», - delingen Úkimet basshysynyń orynbasarynyń jaýabynda.
Onyń atap ótýinshe, muraǵat kózderi men basqa da materialdardy jinaý, zerdeleý, memlekettik komissiiaǵa qorytyndylar daiyndaý jónindegi 11 baǵyt boiynsha jumys toptarynyń quramdary bekitildi.
«Sizderdiń 700-den astam tulǵany quraityn Alash qairatkerleriniń tizimi Memlekettik komissiia qyzmetin súiemeldeý jónindegi jobalyq ofiske, sonymen birge tiisti jumys tobyna joldanyp, qaraý nátijeleri ǵalymdardyń muraǵattarda júrgizgen jumys qorytyndylaryna sáikes usynylatyn bolady (tarihi anyqtama negizinde). Jalpy, barlyq zertteý jáne izdestirý jumystary aiaqtalǵannan keiin Qazaqstannyń bostandyǵy men táýelsizdigi jolynda qýǵyn-súrgin qurbandary bolǵan azamattardyń eńbegi men erlikterin máńgi este qaldyrý jónindegi arnaiy jobany ázirleý josparlanýda», - dedi Eraly Toǵjanov saýalǵa bergen jaýabynda.
