Táýelsizdikten asqan qundylyq joq, ony qadirleý barshamyzdyń qasietti boryshymyz. Bul týraly búgin Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev aitty, dep habarlaidy "Ult aqparat".
«Tuńǵysh ret halqymyz óz taǵdyryna ie boldy. Búginde azamattarymyz óziniń jáne memleketimizdiń bolashaǵyna nyq senimmen qaraidy. Elimiz san qily tarih zulmattaryn ótkerip, eńsesin tiktedi. Álem qoǵamdastyǵyna nyq qadam basty. Halyq sany 2 millionǵa kóbeiip, Táýelsizdik aldyndaǵy demografiialyq daǵdarysty eńserdik. Qazir biz 18,5 millionnan astyq. Memleketimizdiń damý baǵdaryn ózimiz aiqyndaý múmkindigin aldyq», - dedi Q.Toqaev.
Memleket basshysy búginde elimizdiń jańǵyrý úrdisin Qazaqstan joly dep aitatyndyǵyna nazar aýdartty.
«Osyndai aýqymdy ózgeristerge Tuńǵysh Prezidentimiz Nursultan Nazarbaev bastamashy jáne kóshbasshy boldy. Jahan jurtshylyǵy Elbasymyzdy álemdik deńgeidegi tarihi tulǵa retinde moiyndady. Barlyq salada tolaiym tabysqa keneldik dep kúmánsiz aitýǵa bolady. Muny búgingi býyn jáne keler urpaq baǵalaýy kerek. «Beinet kórmei dáýlet joq» dep hákim Abai aitqandai, biz buǵan ońailyqpen jetken joqpyz. Sondyqtan bul mereke búkil halqymyzǵa ortaq táýbeniń toiy, mártebeniń merekesi. Táýelsizdikten asqan qundylyq joq. Ony qadirleý barshamyzdyń qasietti boryshymyz», - dedi Qazaqstan Prezidenti.
