Astanada «AMANAT» partiiasynyń qoldaýymen «Táýelsiz elim – tiregim!» respýblikalyq aqyndar aitysy ótti. Jyr alamany el egemendigi men ult tutastyǵyna arnaldy.
Aitystyń ashylýynda «AMANAT»-tyń Atqarýshy hatshysy Ashat Oralov partiianyń uiytqy bolýymen biyl birqatar respýblikalyq aitys uiymdastyrylǵanyn atap ótti. Sondai-aq, partiia ulttyq mádeniet pen ónerdi damytýǵa únemi úlken úles qosyp kele jatqanyn jetkizdi.
«Táýelsizdikten baǵaly eshteńe joq. Sondyqtan, búgingi jyr dodasynyń jóni bólek. Aitys – qazaqtyń boitumary, ata-babalarymyzdan amanat bolyp jetken kieli óner jádigeri. Ultymyzdyń rýhaniiatyn, mádenietin damytý men qoldaý isi bir sát te toqtamaidy. Biz ulttyq ónerdi qoldaýdy aldaǵy ýaqytta da jalǵastyramyz», – dedi Ashat Oralov.
Aitys tizginin ustaǵan aqyn, Májilis depýtaty Amanjol Áltai dúbirli dodanyń máni men mańyzyna toqtalyp, qazylar alqasynyń quramyn jáne synǵa túsetin aqyndar qaýymyn tanystyrdy. Óz kezeginde, elimizdiń túkpir-túkpirinen Astana tórine at basyn burǵan 14 aqyn kóziqaraqty kórermenniń aldynda oramdy oi aityp, súbeli sóz órbitti.
Aqyndardyń jeti juby eń asyl qazynamyz sanalatyn azattyqtyń qadir-qasietin jyrǵa qosty. Sóitip, tús aýa bastalǵan sóz barymtasy qas qaraiǵansha jalǵasty. Soǵan qaramastan, qanǵa sińgen qasterli ónerdiń qadirin biletin aitys súier qaýym bir sátke bolsyn tarap ketken joq. Tapjylmai tamashalady.
«Aitys – aqsúiek óner. Búgin halyqtyń yqylasyna bólengen alaman uiymdastyryldy. «AMANAT» partiiasy aldaǵy ýaqytta da rýhaniiat pen mádenietke, qazaqtyń bolmysyna, tiline, diline arnalǵan osyndai is-sharalardy ótkizýdi jalǵastyrady dep senemin», – dep atap ótti qazylar alqasynyń tóraǵasy Ǵalym Jailybai.
Osylaisha, kórnekti aqyn, Abai atyndaǵy memlekettik syilyqtyń laýreaty Ǵalym Jailybai bastaǵan qazylar quramynyń sheshimimen bas júldeni qyzylordalyq Meiirbek Sultanhan ielendi. Al júldeli 1-oryn túrkistandyq Bekarys Shoibekovke, 2-oryn ulytaýlyq Tólegen Jamanovqa buiyrdy. 3-oryndy aqtóbelik Nurbol Jaýynbaev, Abai oblysynan kelgen Rústem Qaiyrtaiuly, kókshetaýlyq Nurmahan Jaqypbek jáne qostanailyq Aibek Qaliev ózara bólisti.
Saiysqa túsken barsha aqynǵa qomaqty syi-siiapat tabystaldy.
«Búgin elorda tórinde ulttyq ónerimiz ulyqtalyp, jyr jármeńkesi qanat jaidy. Bul – aitys óneriniń abyroiy asqaqtaǵan kún. Tól ónerimiz ǵasyrdan ǵasyrǵa jalǵasa berýine tilektespin. Jyr báigesin joǵary deńgeide uiymdastyrǵan el aǵalaryna, altyn ýaqytyn qiyp kelgen kórermenge alǵysym sheksiz. Táýelsizdigimizdiń tuǵyry biik bolsyn. Elimiz máńgi jasasyn», – dedi jyr báigesiniń jeńimpazy Meiirbek Sultanhan.
